الترجمة الأردية

ہم سے عبدان اور محمد بن مقاتل نے بیان کیا، دونوں نے فرمایا ہمیں عبداللہ بن مبارک رحمۃ اللہ تعالیٰ علیہ نے خبر دی، ہمیں عاصم بن سلیمان نے خبر دی، ان سے ابوعثمان (عبدالرحمٰن نہدی) نے بیان کیا، فرمایا مجھ سے حضرت اسامہ بن زید رضی اللہ تعالیٰ عنہما نے بیان کیا کہ نبی کریم صلی اللہ تعالیٰ علیہ وآلہ وسلم کی ایک صاحبزادی (حضرت زینب رضی اللہ تعالیٰ عنہا) نے آپ صلی اللہ تعالیٰ علیہ وآلہ وسلم کو پیغام بھیجا کہ میرا ایک بچہ جان کنی میں ہے، تشریف لائیں۔ آپ صلی اللہ تعالیٰ علیہ وآلہ وسلم نے واپس پیغام بھیجا اور سلام کہلوایا اور فرمایا: اللہ تعالیٰ ہی کا ہے جو اس نے لیا اور اسی کا ہے جو اس نے دیا، اور ہر چیز اس کے ہاں ایک مقررہ وقت تک ہے۔ پس صبر کرے اور ثواب کی امید رکھے۔ پھر انہوں نے قسم دے کر بلوایا کہ ضرور تشریف لائیں۔ تو آپ صلی اللہ تعالیٰ علیہ وآلہ وسلم کھڑے ہوئے، آپ کے ساتھ حضرت سعد بن عبادہ، حضرت معاذ بن جبل، حضرت ابی بن کعب، حضرت زید بن ثابت رضی اللہ تعالیٰ عنہم اور کئی حضرات تھے۔ بچے کو رسول اللہ صلی اللہ تعالیٰ علیہ وآلہ وسلم کی گود میں دیا گیا اور اس کی سانسیں اکھڑ رہی تھیں — ابوعثمان نے فرمایا: میرا خیال ہے اسامہ رضی اللہ تعالیٰ عنہ نے فرمایا: گویا پرانا مشکیزہ ہو — یہ دیکھ کر آپ صلی اللہ تعالیٰ علیہ وآلہ وسلم کی آنکھوں سے آنسو بہ نکلے۔ حضرت سعد رضی اللہ تعالیٰ عنہ نے عرض کیا: یا رسول اللہ! یہ کیا ہے؟ ارشاد فرمایا: یہ رحمت ہے جو اللہ تعالیٰ نے اپنے بندوں کے دلوں میں رکھی ہے اور اللہ تعالیٰ اپنے بندوں میں سے انہی پر رحم فرماتا ہے جو (دوسروں پر) رحم کرنے والے ہوں۔