اردو ترجمہ

ہم سے عبداللہ بن یوسف نے بیان کیا، کہا کہ ہمیں امام مالک رحمۃ اللہ تعالیٰ علیہ نے خبر دی، ابن شہاب سے، انہیں عطاء بن یزید لیثی نے اور انہیں حضرت ابو سعید خدری رضی اللہ تعالیٰ عنہ نے بیان کیا کہ انصار کے کچھ لوگوں نے رسول اللہ صلی اللہ تعالیٰ علیہ وآلہ وسلم سے سوال کیا تو آپ صلی اللہ تعالیٰ علیہ وآلہ وسلم نے انہیں عطا فرمایا۔ پھر انہوں نے سوال کیا اور آپ صلی اللہ تعالیٰ علیہ وآلہ وسلم نے پھر عطا فرمایا۔ یہاں تک کہ جو مال آپ صلی اللہ تعالیٰ علیہ وآلہ وسلم کے پاس تھا وہ ختم ہو گیا۔ پھر آپ صلی اللہ تعالیٰ علیہ وآلہ وسلم نے ارشاد فرمایا: اگر میرے پاس جو مال و دولت ہو تو میں اسے بچا کر نہیں رکھوں گا۔ مگر جو شخص سوال کرنے سے بچتا ہے تو اللہ تعالیٰ بھی اسے سوال کرنے سے محفوظ رکھتا ہے۔ اور جو شخص بے نیازی برتتا ہے تو اللہ تعالیٰ اسے بے نیاز بنا دیتا ہے۔ اور جو شخص اپنے اوپر زور ڈال کر بھی صبر کرتا ہے تو اللہ تعالیٰ بھی اسے صبر و استقلال عطا فرماتا ہے۔ اور کسی کو بھی صبر سے زیادہ بہتر اور اس سے زیادہ بے پایاں خیر نہیں ملی (صبر تمام نعمتوں سے بڑھ کر ہے)۔