الترجمة الأردية

ہم سے محمد بن عبید بن میمون نے بیان کیا، انہوں نے کہا ہم سے عیسیٰ بن یونس نے بیان کیا، ان سے اعمش نے، ان سے ابراہیم نخعی رحمۃ اللہ تعالیٰ علیہ نے، ان سے علقمہ نے اور ان سے حضرت عبداللہ بن مسعود رضی اللہ تعالیٰ عنہ نے بیان کیا کہ میں نبی کریم صلی اللہ تعالیٰ علیہ وآلہ وسلم کے ساتھ مدینہ منورہ کے ایک کھیت میں تھا۔ آپ صلی اللہ تعالیٰ علیہ وآلہ وسلم کھجور کی ایک شاخ کا سہارا لیے ہوئے تھے۔ کچھ یہودی ادھر سے گزرے تو ان میں سے بعض نے کہا: ان سے روح کے بارے میں پوچھو۔ اور بعض نے کہا: نہ پوچھو، کہیں ایسی بات نہ سنا دیں جو تمہیں ناپسند ہو۔ بالآخر وہ لوگ آپ صلی اللہ تعالیٰ علیہ وآلہ وسلم کے پاس آئے اور کہا: اے ابوالقاسم! ہمیں روح کے بارے میں بتائیے۔ نبی کریم صلی اللہ تعالیٰ علیہ وآلہ وسلم کچھ دیر کھڑے رہے اور دیکھتے رہے۔ میں سمجھ گیا کہ آپ پر وحی نازل ہو رہی ہے۔ میں پیچھے ہٹ گیا، یہاں تک کہ وحی کا نزول مکمل ہوا۔ پھر آپ صلی اللہ تعالیٰ علیہ وآلہ وسلم نے تلاوت فرمائی: «وَيَسْأَلُونَكَ عَنِ الرُّوحِ قُلِ الرُّوحُ مِنْ أَمْرِ رَبِّي» (اور آپ سے روح کے بارے میں سوال کرتے ہیں، فرما دیجیے: روح میرے رب کے حکم سے ہے)۔