اردو ترجمہ

ہم سے قتیبہ بن سعید نے بیان کیا، کہا ہم سے جریر نے بیان کیا، ان سے اعمش نے، ان سے ابوصالح نے اور ان سے حضرت ابوہریرہ رضی اللہ تعالیٰ عنہ نے بیان کیا کہ رسول اللہ صلی اللہ تعالیٰ علیہ وآلہ وسلم نے ارشاد فرمایا: بے شک اللہ تعالیٰ کے فرشتے ہیں جو راستوں میں گھومتے ہیں اور ذکر کرنے والوں کو ڈھونڈتے ہیں۔ جب وہ کسی قوم کو اللہ کا ذکر کرتے ہوئے پاتے ہیں تو ایک دوسرے کو آواز دیتے ہیں: آؤ اپنی مطلوب چیز کی طرف۔ پھر وہ انہیں اپنے پروں سے آسمان دنیا تک ڈھانپ لیتے ہیں۔ پھر ان کا رب ان سے پوچھتا ہے حالانکہ وہ ان سے بہتر جانتا ہے: میرے بندے کیا کہتے ہیں؟ فرشتے عرض کرتے ہیں: وہ تیری تسبیح کرتے ہیں، تکبیر کہتے ہیں، تیری حمد بیان کرتے ہیں اور تیری تمجید کرتے ہیں۔ پوچھتا ہے: کیا انہوں نے مجھے دیکھا ہے؟ فرشتے عرض کرتے ہیں: نہیں، اللہ کی قسم! انہوں نے تجھے نہیں دیکھا۔ فرماتا ہے: اگر وہ مجھے دیکھ لیتے تو کیا ہوتا؟ فرشتے عرض کرتے ہیں: اگر وہ تجھے دیکھ لیتے تو اور زیادہ عبادت کرتے، اور زیادہ تمجید کرتے اور اور زیادہ تسبیح کرتے۔ فرماتا ہے: وہ مجھ سے کیا مانگتے ہیں؟ فرشتے عرض کرتے ہیں: جنت مانگتے ہیں۔ فرماتا ہے: کیا انہوں نے اسے دیکھا ہے؟ فرشتے عرض کرتے ہیں: نہیں، اللہ کی قسم! اے رب! انہوں نے اسے نہیں دیکھا۔ فرماتا ہے: اگر وہ اسے دیکھ لیتے تو کیا ہوتا؟ فرشتے عرض کرتے ہیں: اگر وہ اسے دیکھ لیتے تو اس کی اور زیادہ حرص کرتے، اور زیادہ طلب کرتے اور اس کی اور زیادہ رغبت رکھتے۔ فرماتا ہے: وہ کس چیز سے پناہ مانگتے ہیں؟ فرشتے عرض کرتے ہیں: جہنم سے۔ فرماتا ہے: کیا انہوں نے اسے دیکھا ہے؟ فرشتے عرض کرتے ہیں: نہیں، اللہ کی قسم! انہوں نے اسے نہیں دیکھا۔ فرماتا ہے: اگر وہ اسے دیکھ لیتے تو کیا ہوتا؟ فرشتے عرض کرتے ہیں: اگر وہ اسے دیکھ لیتے تو اس سے اور زیادہ بھاگتے اور اس سے اور زیادہ ڈرتے۔ فرماتا ہے: میں تمہیں گواہ بناتا ہوں کہ میں نے انہیں بخش دیا۔ فرشتوں میں سے ایک فرشتہ عرض کرتا ہے: ان میں فلاں شخص ہے جو ان میں سے نہیں ہے بلکہ وہ کسی کام سے آیا تھا۔ فرماتا ہے: یہ وہ ہم نشین ہیں جن کا ہم نشین بدبخت نہیں ہوتا۔ شعبہ نے اعمش سے یہ حدیث روایت کی لیکن مرفوع نہیں کی۔ سہیل نے اپنے والد سے، انہوں نے حضرت ابوہریرہ رضی اللہ تعالیٰ عنہ سے اور انہوں نے نبی کریم صلی اللہ تعالیٰ علیہ وآلہ وسلم سے روایت کیا ہے۔