اردو ترجمہ

ہم سے یحییٰ بن جعفر نے بیان کیا، کہا ہم سے عبدالرزاق نے بیان کیا، ان سے معمر نے، ان سے ہمام نے اور ان سے حضرت ابوہریرہ رضی اللہ تعالیٰ عنہ نے نبی کریم صلی اللہ تعالیٰ علیہ وآلہ وسلم سے روایت کیا، آپ صلی اللہ تعالیٰ علیہ وآلہ وسلم نے ارشاد فرمایا کہ اللہ تعالیٰ نے آدم علیہ السلام کو ان کی صورت پر پیدا کیا، ان کا قد ساٹھ ہاتھ تھا۔ جب اللہ تعالیٰ نے انہیں پیدا فرمایا تو فرمایا جاؤ اور فرشتوں کی اس جماعت کو سلام کرو جو بیٹھے ہیں اور سنو کہ وہ تمہیں کیا جواب دیتے ہیں کیونکہ یہی تمہارا اور تمہاری اولاد کا سلام ہوگا۔ پس آدم علیہ السلام نے کہا السلام علیکم۔ فرشتوں نے جواب دیا السلام علیک ورحمۃ اللہ۔ انہوں نے ورحمۃ اللہ کا اضافہ کیا۔ پس جو بھی جنت میں داخل ہوگا آدم علیہ السلام کی صورت پر ہوگا، اس وقت سے اب تک مخلوق کا قد گھٹتا چلا آ رہا ہے۔