اردو ترجمہ

ہم سے اسماعیل بن ابی اویس نے بیان کیا، کہا مجھ سے امام مالک بن انس رحمۃ اللہ تعالیٰ علیہ نے بیان کیا، وہ ابوالنضر سے جو عمر بن عبیداللہ کے آزاد کردہ غلام تھے، کہ ابومرّہ جو اُمّ ہانئ بنت ابی طالب رضی اللہ تعالیٰ عنہا کے آزاد کردہ غلام تھے، انہوں نے خبر دی کہ انہوں نے اُمّ ہانئ بنت ابی طالب رضی اللہ تعالیٰ عنہا کو فرماتے سنا کہ میں فتح مکہ کے سال رسول اللہ صلی اللہ تعالیٰ علیہ وآلہ وسلم کی خدمت میں حاضر ہوئی تو آپ صلی اللہ تعالیٰ علیہ وآلہ وسلم کو غسل فرماتے پایا اور حضرت فاطمہ رضی اللہ تعالیٰ عنہا آپ صلی اللہ تعالیٰ علیہ وآلہ وسلم پر پردہ کیے ہوئے تھیں۔ فرماتی ہیں کہ میں نے آپ صلی اللہ تعالیٰ علیہ وآلہ وسلم کو سلام عرض کیا تو آپ صلی اللہ تعالیٰ علیہ وآلہ وسلم نے دریافت فرمایا یہ کون ہے؟ میں نے عرض کیا میں اُمّ ہانئ بنت ابی طالب ہوں۔ آپ صلی اللہ تعالیٰ علیہ وآلہ وسلم نے ارشاد فرمایا اُمّ ہانئ کو خوش آمدید۔ پھر جب آپ صلی اللہ تعالیٰ علیہ وآلہ وسلم غسل سے فارغ ہوئے تو کھڑے ہوئے اور ایک کپڑے میں لپٹ کر آٹھ رکعت نماز ادا فرمائی۔ جب آپ صلی اللہ تعالیٰ علیہ وآلہ وسلم فارغ ہوئے تو میں نے عرض کیا یا رسول اللہ! میرے سگے بھائی (حضرت علی کرّم اللہ تعالیٰ وجہہ الکریم) کا کہنا ہے کہ وہ ایک شخص کو قتل کریں گے جسے میں نے پناہ دی ہے، یعنی فلاں بن ہبیرہ کو۔ تو رسول اللہ صلی اللہ تعالیٰ علیہ وآلہ وسلم نے ارشاد فرمایا اے اُمّ ہانئ! جسے تم نے پناہ دی ہم نے بھی اسے پناہ دی۔ اُمّ ہانئ رضی اللہ تعالیٰ عنہا نے فرمایا کہ یہ واقعہ چاشت کے وقت کا ہے۔