اردو ترجمہ

حضرت براء بن عازب رضی اللہ تعالیٰ عنہما فرماتے ہیں: نبی کریم صلی اللہ تعالیٰ علیہ وآلہ وسلم نے مجھ سے ارشاد فرمایا: جب تم اپنے بستر پر لیٹنے آؤ تو نماز جیسا وضو کرو، پھر اپنی دائیں کروٹ پر لیٹو اور یہ دعا پڑھو: «اَللّٰهُمَّ أَسْلَمْتُ وَجْهِي إِلَيْكَ، وَفَوَّضْتُ أَمْرِي إِلَيْكَ، وَأَلْجَأْتُ ظَهْرِي إِلَيْكَ، رَغْبَةً وَرَهْبَةً إِلَيْكَ، لَا مَلْجَأَ وَلَا مَنْجَا مِنْكَ إِلَّا إِلَيْكَ، اَللّٰهُمَّ آمَنْتُ بِكِتَابِكَ الَّذِي أَنْزَلْتَ، وَبِنَبِيِّكَ الَّذِي أَرْسَلْتَ» (اے اللہ! میں نے اپنا رخ تیری طرف کر لیا، اپنا معاملہ تیرے سپرد کر دیا، تیرے ثواب کی امید اور تیرے عذاب کے خوف سے اپنی پشت تیرے سہارے لگا دی۔ تیرے سوا کوئی پناہ گاہ اور نجات کی جگہ نہیں۔ اے اللہ! تیری نازل کردہ کتاب پر اور تیرے بھیجے ہوئے نبی پر میں ایمان لایا)۔ اگر اسی رات (اسی حالت میں) تمہارا انتقال ہو گیا تو فطرت (اسلام) پر مرو گے، اور ان کلمات کو اپنی آخری بات بناؤ (سونے سے پہلے)۔ حضرت براء رضی اللہ تعالیٰ عنہ فرماتے ہیں: میں نے نبی کریم صلی اللہ تعالیٰ علیہ وآلہ وسلم کے سامنے اسے دہرایا۔ جب «اَللّٰهُمَّ آمَنْتُ بِكِتَابِكَ الَّذِي أَنْزَلْتَ» پر پہنچا تو میں نے «وَرَسُولِكَ» کہہ دیا۔ آپ نے ارشاد فرمایا: نہیں! (یوں کہو:) «وَنَبِيِّكَ الَّذِي أَرْسَلْتَ» (اور تیرے نبی پر جو تو نے بھیجا)۔