اردو ترجمہ

حضرت عبداللہ بن معقل سے روایت ہے، انہوں نے فرمایا: میں حضرت کعب بن عجرہ رضی اللہ تعالیٰ عنہ کے پاس بیٹھا ہوا تھا۔ میں نے ان سے فدیے کے بارے میں دریافت کیا تو انہوں نے فرمایا: یہ (قرآن شریف کی) آیت خاص میرے بارے میں نازل ہوئی تھی لیکن اس کا حکم تم سب کے لیے عام ہے۔ ہوا یوں کہ مجھے رسول اللہ صلی اللہ تعالیٰ علیہ وآلہ وسلم کی بارگاہ میں لایا گیا تو جوئیں میرے چہرے پر گر رہی تھیں۔ آپ صلی اللہ تعالیٰ علیہ وآلہ وسلم نے (یہ حال دیکھ کر) ارشاد فرمایا: میرا گمان نہ تھا کہ تمہاری تکلیف اس حد تک پہنچ چکی ہے جو میں دیکھ رہا ہوں، یا (آپ نے یوں) فرمایا: مجھے خیال نہ تھا کہ مشقت تمہیں اس درجے تک پہنچا دے گی جو نظر آ رہی ہے۔ کیا تم ایک بکری (بطور فدیہ) دے سکتے ہو؟ میں نے عرض کی: نہیں۔ آپ صلی اللہ تعالیٰ علیہ وآلہ وسلم نے ارشاد فرمایا: پھر تین دن کے روزے رکھ لو یا چھ مسکینوں کو کھانا کھلاؤ، ہر مسکین کو آدھا صاع۔