اردو ترجمہ

ہم سے حسن بن علی خلال ہذلی نے بیان کیا، کہا کہ ہم سے عبدالصمد بن عبدالوارث نے بیان کیا، کہا کہ ہم سے سلیم بن حیان نے بیان کیا، کہا کہ میں نے مروان اصفر سے سنا اور ان سے حضرت انس بن مالک رضی اللہ تعالیٰ عنہ نے بیان کیا کہ حضرت علی المرتضیٰ کرّم اللہ تعالیٰ وجہہ الکریم یمن سے نبی کریم صلی اللہ تعالیٰ علیہ وآلہ وسلم کی بارگاہ میں حاضر ہوئے۔ آپ صلی اللہ تعالیٰ علیہ وآلہ وسلم نے دریافت فرمایا: تم نے کس چیز کا احرام باندھا ہے؟ انہوں نے عرض کیا: جس کا نبی کریم صلی اللہ تعالیٰ علیہ وآلہ وسلم نے باندھا ہو (اسی کا)۔ آپ صلی اللہ تعالیٰ علیہ وآلہ وسلم نے ارشاد فرمایا: اگر میرے ساتھ قربانی کا جانور نہ ہوتا تو میں (عمرہ کر کے) حلال ہو جاتا۔ اور محمد بن بکر نے ابن جریج سے یہ زیادتی نقل کی ہے کہ نبی کریم صلی اللہ تعالیٰ علیہ وآلہ وسلم نے فرمایا: اے علی! تم نے کس چیز کا احرام باندھا ہے؟ انہوں نے عرض کیا: جس کا نبی کریم صلی اللہ تعالیٰ علیہ وآلہ وسلم نے باندھا ہو۔ آپ صلی اللہ تعالیٰ علیہ وآلہ وسلم نے فرمایا: قربانی کرو اور اسی حالتِ احرام پر جاری رہو جیسے ہو۔