Urdu Translation

ہم سے قتیبہ بن سعید نے بیان کیا، کہا ہم سے اسماعیل بن جعفر نے بیان کیا، ان سے عمرو بن ابی عمرو نے جو مطلب بن عبداللہ بن حنطب کے آزاد کردہ غلام تھے، انہوں نے حضرت انس بن مالک رضی اللہ تعالیٰ عنہ سے سنا، فرماتے تھے کہ رسول اللہ صلی اللہ تعالیٰ علیہ وآلہ وسلم نے حضرت ابوطلحہ رضی اللہ تعالیٰ عنہ سے ارشاد فرمایا: اپنے لڑکوں میں سے کوئی لڑکا ڈھونڈو جو میری خدمت کرے۔ تو حضرت ابوطلحہ رضی اللہ تعالیٰ عنہ مجھے اپنے پیچھے سوار کر کے لے گئے۔ میں رسول اللہ صلی اللہ تعالیٰ علیہ وآلہ وسلم کی خدمت کیا کرتا تھا جب بھی آپ کہیں قیام فرماتے۔ میں آپ کو اکثر یہ دعا پڑھتے سنتا تھا: اللَّهُمَّ إِنِّي أَعُوذُ بِكَ مِنَ الْهَمِّ وَالْحَزَنِ وَالْعَجْزِ وَالْكَسَلِ وَالْبُخْلِ وَالْجُبْنِ وَضَلَعِ الدَّيْنِ وَغَلَبَةِ الرِّجَالِ (اے اللہ! میں تیری پناہ مانگتا ہوں غم اور رنج سے، عاجزی اور سستی سے، بخل اور بزدلی سے اور قرض کے بوجھ اور لوگوں کے غلبے سے)۔ میں برابر آپ کی خدمت کرتا رہا یہاں تک کہ ہم خیبر سے واپس آئے اور آپ حضرت اُمّ المؤمنین صفیہ بنت حیی رضی اللہ تعالیٰ عنہا کو ساتھ لائے جنہیں آپ نے (مال غنیمت سے) چنا تھا۔ میں دیکھتا تھا کہ آپ اپنے پیچھے عبا یا چادر سے اونٹ پر جگہ بناتے پھر ان کو اپنے پیچھے سوار کرتے۔ جب ہم مقام صہباء پہنچے تو آپ نے چمڑے کے دستر خوان پر حیس تیار کیا، پھر مجھے بھیجا تو میں نے لوگوں کو بلایا اور انہوں نے کھانا کھایا اور یہی آپ کا ان سے ولیمہ تھا۔ پھر آپ آگے بڑھے یہاں تک کہ آپ کو احد پہاڑ نظر آیا تو ارشاد فرمایا: یہ پہاڑ ہم سے محبت رکھتا ہے اور ہم اس سے محبت رکھتے ہیں۔ پھر جب مدینہ نظر آیا تو ارشاد فرمایا: اے اللہ! میں اس کے دونوں پہاڑوں کے درمیان (کی زمین) کو حرام قرار دیتا ہوں جیسے ابراہیم علیہ السلام نے مکہ کو حرام قرار دیا تھا۔ اے اللہ! ان کے مد اور صاع میں برکت عطا فرما۔