الترجمة الأردية

ہم سے ابومعمر نے بیان کیا، کہا ہم سے عبدالوارث نے بیان کیا، کہا ہم سے حسین نے بیان کیا، کہا ہم سے عبداللہ بن بریدہ نے بیان کیا، ان سے بشیر بن کعب عدوی نے بیان کیا، کہا مجھ سے حضرت شداد بن اوس رضی اللہ تعالیٰ عنہ نے نبی کریم صلی اللہ تعالیٰ علیہ وآلہ وسلم سے روایت کیا: سید الاستغفار (استغفار کا سب سے بہتر طریقہ) یہ ہے کہ تم کہو: اے اللہ! تو میرا رب ہے، تیرے سوا کوئی معبود نہیں، تو نے مجھے پیدا فرمایا اور میں تیرا بندہ ہوں، اور میں اپنی طاقت بھر تیرے عہد اور وعدے پر قائم ہوں۔ میں اپنے کیے سے تیری پناہ مانگتا ہوں۔ میں اپنے اوپر تیری نعمت کا اقرار کرتا ہوں اور اپنے گناہوں کا بھی اعتراف کرتا ہوں، پس مجھے بخش دے کیونکہ تیرے سوا کوئی گناہ نہیں بخش سکتا۔ آپ صلی اللہ تعالیٰ علیہ وآلہ وسلم نے ارشاد فرمایا: جو اسے یقین کے ساتھ دن کے وقت پڑھے اور شام سے پہلے فوت ہو جائے تو وہ اہل جنت میں سے ہے اور جو اسے یقین کے ساتھ رات کو پڑھے اور صبح سے پہلے فوت ہو جائے تو وہ اہل جنت میں سے ہے۔