الترجمة الأردية

حضرت ابوہریرہ رضی اللہ تعالیٰ عنہ سے روایت ہے کہ ایک دن نبی کریم صلی اللہ تعالیٰ علیہ وآلہ وسلم لوگوں کے سامنے تشریف فرما تھے کہ جبرائیل علیہ السلام تشریف لائے اور عرض کیا: ایمان کیا ہے؟ آپ صلی اللہ تعالیٰ علیہ وآلہ وسلم نے ارشاد فرمایا: ایمان یہ ہے کہ تو اللہ تعالیٰ پر، اس کے فرشتوں پر، اس کی ملاقات پر، اس کے رسولوں پر ایمان لائے اور قیامت کے دن دوبارہ اٹھائے جانے پر ایمان لائے۔ عرض کیا: اسلام کیا ہے؟ آپ صلی اللہ تعالیٰ علیہ وآلہ وسلم نے ارشاد فرمایا: اسلام یہ ہے کہ تو اللہ تعالیٰ کی عبادت کرے اور اس کے ساتھ کسی کو شریک نہ ٹھہرائے، نماز قائم کرے، فرض زکوٰۃ ادا کرے اور رمضان کے روزے رکھے۔ عرض کیا: احسان کیا ہے؟ آپ صلی اللہ تعالیٰ علیہ وآلہ وسلم نے ارشاد فرمایا: یہ کہ تو اللہ تعالیٰ کی عبادت ایسے کرے گویا تو اسے دیکھ رہا ہے، اور اگر تو اسے نہیں دیکھ سکتا تو (یہ یقین رکھ کہ) بے شک وہ تجھے دیکھ رہا ہے۔ عرض کیا: قیامت کب آئے گی؟ آپ صلی اللہ تعالیٰ علیہ وآلہ وسلم نے ارشاد فرمایا: جس سے پوچھا جا رہا ہے وہ پوچھنے والے سے زیادہ نہیں جانتا، البتہ میں تمہیں اس کی نشانیاں بتاتا ہوں: جب لونڈی اپنے آقا کو جنے، اور جب ننگے پاؤں اونٹوں کے چرواہے اونچی عمارتیں بنانے میں فخر کریں۔ یہ پانچ چیزوں میں سے ہے جنہیں اللہ تعالیٰ کے سوا کوئی نہیں جانتا۔ پھر نبی کریم صلی اللہ تعالیٰ علیہ وآلہ وسلم نے یہ آیت تلاوت فرمائی: «إِنَّ اللَّهَ عِنْدَهُ عِلْمُ السَّاعَةِ» (بے شک قیامت کا علم اللہ ہی کے پاس ہے) آخر آیت تک۔ پھر وہ شخص پیٹھ پھیر کر چلا گیا۔ آپ صلی اللہ تعالیٰ علیہ وآلہ وسلم نے ارشاد فرمایا: اسے واپس لاؤ۔ لوگوں نے دیکھا تو کوئی نظر نہ آیا۔ آپ صلی اللہ تعالیٰ علیہ وآلہ وسلم نے ارشاد فرمایا: یہ جبرائیل تھے جو لوگوں کو ان کا دین سکھانے آئے تھے۔ ابوعبداللہ (امام بخاری رحمۃ اللہ تعالیٰ علیہ) فرماتے ہیں: آپ صلی اللہ تعالیٰ علیہ وآلہ وسلم نے ان سب باتوں کو ایمان ہی قرار دیا ہے۔