الترجمة الأردية

ہم سے یحییٰ بن بکیر نے بیان کیا، کہا ہم سے لیث نے بیان کیا، ان سے عقیل نے، ان سے ابن شہاب نے، ان سے عروہ بن حضرت زبیر نے بیان کیا کہ ان سے زینب بنت ابی سلمہ نے بیان کیا، ان سے حضرت اُمّ المؤمنین ام حبیبہ بنت ابی سفیان رضی اللہ تعالیٰ عنہا نے اور ان سے حضرت اُمّ المؤمنین زینب بنت جحش رضی اللہ تعالیٰ عنہا نے بیان کیا کہ نبی کریم صلی اللہ تعالیٰ علیہ وآلہ وسلم ان کے یہاں تشریف لائے اور کچھ گھبرائے ہوئے تھے۔ ارشاد فرمایا "لا الٰہ الا اللہ! اہلِ عرب پر اس شر کی وجہ سے بربادی آنے والی ہے جو قریب آ رہا ہے۔ آج یاجوج ماجوج کی دیوار سے اتنا سوراخ ہو گیا ہے" اور آپ نے انگوٹھے اور شہادت کی انگلی سے حلقہ بنا کر دکھایا۔ حضرت اُمّ المؤمنین زینب بنت جحش رضی اللہ تعالیٰ عنہا نے عرض کیا: یا رسول اللہ! کیا ہم ہلاک ہو جائیں گے جبکہ ہم میں نیک لوگ بھی موجود ہوں گے؟ آپ صلی اللہ تعالیٰ علیہ وآلہ وسلم نے ارشاد فرمایا "ہاں، جب فسق و فجور کی کثرت ہو جائے گی (تو ضرور ایسا ہو گا)۔"