اردو ترجمہ

ہم سے اسحاق نے بیان کیا، کہا ہمیں بشر بن شعیب نے خبر دی، کہا مجھ سے میرے والد نے بیان کیا، ان سے زہری نے بیان کیا، کہا مجھے عبداللہ بن کعب نے خبر دی کہ حضرت عبداللہ بن عباس رضی اللہ تعالیٰ عنہما نے انہیں بتایا کہ حضرت علی المرتضیٰ کرّم اللہ تعالیٰ وجہہ الکریم یعنی ابن ابی طالب نبی کریم صلی اللہ تعالیٰ علیہ وآلہ وسلم کے پاس سے نکلے۔ (دوسری سند) اور ہم سے احمد بن صالح نے بیان کیا، کہا ہم سے عنبسہ نے بیان کیا، کہا ہم سے یونس نے بیان کیا ابن شہاب سے، کہا مجھے عبداللہ بن کعب بن مالک نے خبر دی کہ حضرت عبداللہ بن عباس رضی اللہ تعالیٰ عنہما نے انہیں خبر دی کہ حضرت علی المرتضیٰ کرّم اللہ تعالیٰ وجہہ الکریم نبی کریم صلی اللہ تعالیٰ علیہ وآلہ وسلم کے پاس سے اس بیماری کے دوران نکلے جس میں آپ صلی اللہ تعالیٰ علیہ وآلہ وسلم کا وصال ہوا۔ لوگوں نے پوچھا: یا اباالحسن! رسول اللہ صلی اللہ تعالیٰ علیہ وآلہ وسلم کی صبح کیسی ہوئی؟ فرمایا: الحمدللہ صبح افاقے میں ہوئی۔ پھر حضرت عباس رضی اللہ تعالیٰ عنہ نے ان کا ہاتھ پکڑا اور فرمایا: تم دیکھ نہیں رہے؟ واللہ تین دن بعد تم لاٹھی کے غلام ہو جاؤ گے۔ واللہ مجھے نظر آ رہا ہے کہ رسول اللہ صلی اللہ تعالیٰ علیہ وآلہ وسلم اس بیماری میں وصال فرمانے والے ہیں اور میں بنو عبدالمطلب کے چہروں پر موت (کی علامات) پہچانتا ہوں۔ چلو رسول اللہ صلی اللہ تعالیٰ علیہ وآلہ وسلم کے پاس چلیں اور پوچھیں کہ یہ امر (خلافت) کس میں ہوگا۔ اگر ہم میں ہے تو ہمیں معلوم ہو جائے اور اگر ہمارے علاوہ میں ہے تو ہم آپ سے ہمارے حق میں وصیت کرا لیں۔ حضرت علی کرّم اللہ تعالیٰ وجہہ الکریم نے فرمایا: واللہ اگر ہم نے رسول اللہ صلی اللہ تعالیٰ علیہ وآلہ وسلم سے یہ مانگا اور آپ نے ہمیں منع فرما دیا تو پھر لوگ ہمیں کبھی نہ دیں گے۔ اور میں رسول اللہ صلی اللہ تعالیٰ علیہ وآلہ وسلم سے ہرگز یہ نہ مانگوں گا۔