اردو ترجمہ

ہم سے مالک بن اسماعیل نے بیان کیا، کہا ہم سے زہیر بن حضرت معاویہ نے بیان کیا، کہا ہم سے حمید طویل رحمۃ اللہ تعالیٰ علیہ نے حضرت انس بن مالک رضی اللہ تعالیٰ عنہ سے بیان کیا کہ نبی کریم صلی اللہ تعالیٰ علیہ وآلہ وسلم نے قبلے کی جانب (دیوار پر) بلغم دیکھی تو اپنے مبارک ہاتھ سے کھرچ ڈالی۔ آپ صلی اللہ تعالیٰ علیہ وآلہ وسلم کی ناگواری محسوس کی گئی، یا (راوی نے یوں کہا کہ) اس بات سے آپ صلی اللہ تعالیٰ علیہ وآلہ وسلم کی شدید ناگواری اور سختی محسوس کی گئی۔ پھر آپ صلی اللہ تعالیٰ علیہ وآلہ وسلم نے ارشاد فرمایا بے شک تم میں سے جب کوئی نماز میں کھڑا ہوتا ہے تو وہ اپنے رب عزوجل سے سرگوشی کرتا ہے، یا (آپ نے فرمایا) اس کا رب عزوجل اس کے اور قبلے کے درمیان ہوتا ہے۔ لہٰذا اپنے قبلے کی جانب نہ تھوکے، بلکہ بائیں طرف یا قدم کے نیچے تھوک لے۔ پھر آپ صلی اللہ تعالیٰ علیہ وآلہ وسلم نے اپنی مبارک چادر کا کنارہ لیا، اس میں تھوکا اور تہ بہ تہ کر لیا اور ارشاد فرمایا یا اس طرح کر لیا کرو۔