اردو ترجمہ

ہم سے عبداللہ بن یوسف نے بیان کیا، کہا کہ ہمیں امام مالک رحمۃ اللہ تعالیٰ علیہ نے ابن شہاب سے خبر دی، انہیں حضرت عروہ رحمۃ اللہ تعالیٰ علیہ نے اور ان سے حضرت اُمّ المؤمنین عائشہ صدیقہ رضی اللہ تعالیٰ عنہا نے فرمایا کہ حجۃ الوداع میں ہم رسول اللہ صلی اللہ تعالیٰ علیہ وآلہ وسلم کے ساتھ (مدینہ منورہ سے) نکلے اور ہم نے عمرہ کا احرام باندھا۔ پھر نبی کریم صلی اللہ تعالیٰ علیہ وآلہ وسلم نے ارشاد فرمایا کہ جس کے ساتھ قربانی کا جانور ہو وہ حج اور عمرہ دونوں کا ایک ساتھ احرام باندھے، ایسے لوگ دونوں کے احرام سے ایک ساتھ حلال ہوں گے۔ میں بھی مکہ مکرمہ آئی تھی لیکن مجھے حیض آ گیا تھا۔ اس لیے جب ہم نے حج کے ارکان پورے کر لیے تو نبی کریم صلی اللہ تعالیٰ علیہ وآلہ وسلم نے مجھے عبدالرحمٰن کے ساتھ تنعیم کی طرف بھیجا، میں نے وہاں سے عمرہ کا احرام باندھا۔ نبی کریم صلی اللہ تعالیٰ علیہ وآلہ وسلم نے ارشاد فرمایا یہ تمہارے اس عمرہ کے بدلے میں ہے (جسے تم نے حیض کی وجہ سے چھوڑ دیا تھا)۔ جن لوگوں نے عمرہ کا احرام باندھا تھا انہوں نے (طواف و سعی کے بعد) احرام کھول دیا اور دوسرا طواف منیٰ سے واپسی پر کیا۔ لیکن جن لوگوں نے حج اور عمرہ کا احرام ایک ساتھ باندھا تھا (حجِ قران) انہوں نے صرف ایک ہی طواف کیا۔