اردو ترجمہ

امام بخاری رحمۃ اللہ تعالیٰ علیہ نے فرمایا کہ مجھ سے عمرو بن علی نے بیان کیا، کہا کہ ہم سے ابوعاصم نے بیان کیا، ان سے ابن جریج نے بیان کیا اور انہیں عطاء نے خبر دی کہ جب ابن ہشام نے عورتوں کو مردوں کے ساتھ طواف کرنے سے منع کر دیا تو عطاء نے فرمایا کہ تم کس دلیل پر عورتوں کو اس سے منع کر رہے ہو؟ جب کہ نبی کریم صلی اللہ تعالیٰ علیہ وآلہ وسلم کی پاکیزہ ازواجِ مطہرات نے مردوں کے ساتھ طواف فرمایا تھا۔ ابن جریج نے پوچھا یہ پردے (کی آیت نازل ہونے) کے بعد کا واقعہ ہے یا اس سے پہلے کا؟ عطاء نے فرمایا کہ میری عمر کی قسم! میں نے انہیں پردے (کی آیت نازل ہونے) کے بعد دیکھا۔ ابن جریج نے پوچھا کہ پھر مرد عورت مل جل جاتے تھے؟ عطاء نے فرمایا کہ اختلاط نہیں ہوتا تھا۔ حضرت اُمّ المؤمنین عائشہ صدیقہ رضی اللہ تعالیٰ عنہا مردوں سے الگ رہ کر ایک الگ کونے میں طواف فرماتی تھیں، ان کے ساتھ مل کر نہیں کرتی تھیں۔ ایک عورت نے عرض کیا کہ اے اُمّ المؤمنین! چلیے (حجرِ اسود کا) استلام کریں۔ تو آپ نے انکار فرما دیا اور فرمایا کہ تو جا! اور ازواجِ مطہرات رات میں پردے میں تشریف لاتیں کہ پہچانی نہ جائیں اور مردوں کے ساتھ طواف فرماتیں۔ البتہ جب کعبہ کے اندر جانا چاہتیں تو باہر کھڑی ہو جاتیں اور مرد باہر آ جاتے (تو وہ اندر تشریف لے جاتیں)۔ اور میں اور عبید بن عمیر حضرت اُمّ المؤمنین عائشہ رضی اللہ تعالیٰ عنہا کی خدمت میں اس وقت حاضر ہوئے جب آپ ثبیر (پہاڑ) پر ٹھہری ہوئی تھیں۔ ابن جریج نے پوچھا کہ اس وقت پردہ کس چیز سے تھا؟ عطاء نے فرمایا کہ ایک ترکی قبے میں ٹھہری ہوئی تھیں جس پر پردہ پڑا ہوا تھا۔ ہمارے اور ان کے درمیان اس کے سوا کوئی چیز حائل نہ تھی اور میں نے دیکھا کہ ان کے بدن مبارک پر ایک گلابی رنگ کا کرتہ تھا۔