اردو ترجمہ

ہم سے حضرت عثمان بن ابی شیبہ نے بیان کیا، کہا کہ ہم سے جریر نے بیان کیا، ان سے منصور نے، ان سے ابراہیم نخعی رحمۃ اللہ تعالیٰ علیہ نے، ان سے اسود نے اور ان سے حضرت اُمّ المؤمنین عائشہ صدیقہ رضی اللہ تعالیٰ عنہا نے بیان کیا کہ ہم نبی کریم صلی اللہ تعالیٰ علیہ وآلہ وسلم کے ساتھ نکلے، ہماری نیت حج کے سوا اور کچھ نہ تھی۔ جب ہم مکہ مکرمہ پہنچے تو (لوگوں نے) بیت اللہ کا طواف کیا۔ نبی کریم صلی اللہ تعالیٰ علیہ وآلہ وسلم نے حکم فرمایا کہ جو قربانی اپنے ساتھ نہ لایا ہو وہ حلال ہو جائے۔ جن کے پاس ہدی نہیں تھی انہوں نے حلال ہو کر احرام کھول دیا۔ نبی کریم صلی اللہ تعالیٰ علیہ وآلہ وسلم کی ازواجِ مطہرات ہدی نہیں لائی تھیں اس لیے انہوں نے بھی احرام کھول دیا۔ حضرت اُمّ المؤمنین عائشہ رضی اللہ تعالیٰ عنہا نے فرمایا: میں حائضہ ہو گئی تھی اس لیے بیت اللہ کا طواف نہ کر سکی۔ جب محصّب کی رات آئی تو میں نے عرض کیا: یا رسول اللہ! لوگ عمرہ اور حج دونوں کر کے واپس ہو رہے ہیں لیکن میں صرف حج لے کر واپس ہو رہی ہوں۔ آپ صلی اللہ تعالیٰ علیہ وآلہ وسلم نے ارشاد فرمایا: کیا تم نے مکہ مکرمہ آنے کی ان راتوں میں طواف نہیں کیا؟ میں نے عرض کیا: نہیں۔ آپ صلی اللہ تعالیٰ علیہ وآلہ وسلم نے ارشاد فرمایا: اپنے بھائی کے ساتھ تنعیم جاؤ اور وہاں سے عمرہ کا احرام باندھو، پھر فلاں جگہ ہمارے پاس آ جاؤ۔ حضرت اُمّ المؤمنین صفیہ رضی اللہ تعالیٰ عنہا نے فرمایا: مجھے لگتا ہے کہ میں آپ سب کو روک لوں گی (کیونکہ حیض آ گیا ہے)۔ نبی کریم صلی اللہ تعالیٰ علیہ وآلہ وسلم نے ارشاد فرمایا: عقریٰ حلقیٰ! کیا تم نے یومِ نحر (دسویں ذی الحجہ) کو طواف نہیں کیا تھا؟ انہوں نے عرض کیا: جی کیا تھا۔ آپ صلی اللہ تعالیٰ علیہ وآلہ وسلم نے ارشاد فرمایا: پھر کوئی حرج نہیں، چلو روانہ ہو۔ حضرت اُمّ المؤمنین عائشہ رضی اللہ تعالیٰ عنہا نے فرمایا: پھر نبی کریم صلی اللہ تعالیٰ علیہ وآلہ وسلم مجھے ملے، آپ صلی اللہ تعالیٰ علیہ وآلہ وسلم مکہ مکرمہ سے چڑھائی کی طرف جا رہے تھے اور میں نشیب کی طرف آ رہی تھی، یا میں چڑھائی پر جا رہی تھی اور آپ صلی اللہ تعالیٰ علیہ وآلہ وسلم نشیب کی طرف آ رہے تھے۔