اردو ترجمہ

ہم سے عمر بن حفص بن غیاث نے بیان کیا، کہا کہ ہم سے میرے والد نے بیان کیا، کہا کہ ہم سے اعمش نے بیان کیا، ان سے شقیق نے، ان سے عمرو بن الحارث نے اور ان سے حضرت عبداللہ بن مسعود رضی اللہ تعالیٰ عنہ کی بیوی حضرت زینب رضی اللہ تعالیٰ عنہا نے۔ (اعمش نے) فرمایا کہ میں نے اس حدیث کا ذکر ابراہیم نخعی رحمۃ اللہ تعالیٰ علیہ سے کیا تو انہوں نے بھی مجھ سے حضرت ابوعبیدہ سے بیان کیا، ان سے عمرو بن حارث نے اور ان سے حضرت عبداللہ بن مسعود رضی اللہ تعالیٰ عنہ کی بیوی حضرت زینب رضی اللہ تعالیٰ عنہا نے بالکل اسی طرح حدیث بیان کی کہ حضرت زینب رضی اللہ تعالیٰ عنہا نے فرمایا: میں مسجدِ نبوی شریف میں تھی۔ رسول اللہ صلی اللہ تعالیٰ علیہ وآلہ وسلم کو میں نے دیکھا، آپ صلی اللہ تعالیٰ علیہ وآلہ وسلم یہ ارشاد فرما رہے تھے: صدقہ کرو، خواہ اپنے زیور ہی میں سے دو۔ اور حضرت زینب رضی اللہ تعالیٰ عنہا اپنا صدقہ اپنے شوہر حضرت عبداللہ بن مسعود رضی اللہ تعالیٰ عنہ اور چند یتیموں پر بھی جو ان کی پرورش میں تھے خرچ کیا کرتی تھیں۔ اس لیے انہوں نے اپنے خاوند سے فرمایا: آپ رسول اللہ صلی اللہ تعالیٰ علیہ وآلہ وسلم سے دریافت فرمائیں کہ کیا وہ صدقہ بھی مجھ سے کفایت کرے گا جو میں آپ پر اور ان چند یتیموں پر خرچ کروں جو میری سپردگی میں ہیں۔ لیکن حضرت عبداللہ بن مسعود رضی اللہ تعالیٰ عنہ نے فرمایا: تم خود جا کر رسول اللہ صلی اللہ تعالیٰ علیہ وآلہ وسلم سے دریافت کر لو۔ آخر میں خود رسول اللہ صلی اللہ تعالیٰ علیہ وآلہ وسلم کی بارگاہ میں حاضر ہوئی۔ اس وقت میں نے آپ صلی اللہ تعالیٰ علیہ وآلہ وسلم کے دروازے پر ایک انصاری خاتون کو پایا جو میری ہی جیسی ضرورت لے کر موجود تھیں۔ پھر ہمارے سامنے سے حضرت بلال رضی اللہ تعالیٰ عنہ گزرے تو ہم نے ان سے عرض کیا: آپ رسول اللہ صلی اللہ تعالیٰ علیہ وآلہ وسلم سے یہ مسئلہ دریافت فرمائیں کہ کیا وہ صدقہ مجھ سے کفایت کرے گا جسے میں اپنے شوہر اور اپنی زیرِ تحویل چند یتیم بچوں پر خرچ کر دوں۔ ہم نے حضرت بلال رضی اللہ تعالیٰ عنہ سے یہ بھی عرض کیا کہ ہمارا نام نہ لینا۔ وہ اندر گئے اور آپ صلی اللہ تعالیٰ علیہ وآلہ وسلم سے عرض کیا کہ دو خواتین مسئلہ دریافت فرماتی ہیں۔ تو نبی کریم صلی اللہ تعالیٰ علیہ وآلہ وسلم نے ارشاد فرمایا: یہ دونوں کون ہیں؟ حضرت بلال رضی اللہ تعالیٰ عنہ نے عرض کیا: زینب نام کی ہیں۔ آپ صلی اللہ تعالیٰ علیہ وآلہ وسلم نے ارشاد فرمایا: کون سی زینب؟ حضرت بلال رضی اللہ تعالیٰ عنہ نے عرض کیا: حضرت عبداللہ بن مسعود رضی اللہ تعالیٰ عنہ کی بیوی۔ آپ صلی اللہ تعالیٰ علیہ وآلہ وسلم نے ارشاد فرمایا: ہاں! بیشک درست ہے۔ اور انہیں دو گنا ثواب ملے گا: ایک قرابت داری کا اور دوسرا خیرات کرنے کا۔