اردو ترجمہ

ہم سے عمر بن حفص بن غیاث نے بیان کیا، کہا ہم سے میرے والد نے بیان کیا، ان سے اعمش نے بیان کیا، ان سے شقیق نے بیان کیا اور ان سے حضرت خباب بن ارت رضی اللہ تعالیٰ عنہ نے فرمایا کہ ہم نے نبی کریم صلی اللہ تعالیٰ علیہ وآلہ وسلم کے ساتھ اللہ تعالیٰ کی رضا کے لیے ہجرت کی، پس ہمارا اجر اللہ تعالیٰ کے ذمّے ہوا۔ ہم میں سے بعض ایسے تھے جن کا انتقال ہو گیا اور انہوں نے (اس دنیا میں) اپنے اجر سے کچھ بھی نہیں پایا؛ ان میں حضرت مصعب بن عمیر رضی اللہ تعالیٰ عنہ بھی تھے۔ اور ہم میں سے بعض ایسے بھی ہیں جن کا پھل پک گیا اور وہ اسے چن رہے ہیں۔ (حضرت مصعب رضی اللہ تعالیٰ عنہ) غزوہ اُحد کے دن شہید ہوئے تو ہمیں ان کے کفن کے لیے ایک چادر کے سوا اور کچھ نہ ملا۔ اگر اس سے سر ڈھانکتے تو پاؤں کھل جاتے اور پاؤں ڈھانکتے تو سر کھل جاتا۔ آخر نبی کریم صلی اللہ تعالیٰ علیہ وآلہ وسلم نے ارشاد فرمایا کہ سر ڈھانک دو اور پاؤں پر اذخر (ایک قسم کی خوشبودار گھاس) ڈال دو۔