اردو ترجمہ

ہم سے محمد نے بیان کیا، کہا ہم سے عبدالوہاب ثقفی نے بیان کیا، ان سے ایوب نے، ان سے محمد بن سیرین نے اور ان سے حضرت اُمّ عطیہ رضی اللہ تعالیٰ عنہا نے فرمایا کہ رسول اللہ صلی اللہ تعالیٰ علیہ وآلہ وسلم ہمارے پاس تشریف لائے اور ہم آپ صلی اللہ تعالیٰ علیہ وآلہ وسلم کی صاحبزادی کو غسل دے رہی تھیں۔ آپ صلی اللہ تعالیٰ علیہ وآلہ وسلم نے ارشاد فرمایا: انہیں تین بار یا پانچ بار یا اس سے زیادہ بار پانی اور بیری کے پتوں سے غسل دو اور آخری بار میں کافور ملا دو۔ جب فارغ ہو جاؤ تو مجھے اطلاع دو۔ جب ہم فارغ ہوئیں تو ہم نے آپ صلی اللہ تعالیٰ علیہ وآلہ وسلم کو اطلاع دی۔ آپ صلی اللہ تعالیٰ علیہ وآلہ وسلم نے ہمیں اپنا ازار (تہبند) عطا فرمایا اور ارشاد فرمایا: اسے ان کی قمیص بنا دو۔ ایوب نے فرمایا کہ حفصہ نے بھی محمد بن سیرین کی حدیث کی مثل بیان کیا اور حفصہ کی حدیث میں یہ تھا کہ (آپ صلی اللہ تعالیٰ علیہ وآلہ وسلم نے فرمایا) طاق غسل دو۔ اور اس میں یہ بھی تھا کہ تین بار یا پانچ بار یا سات بار۔ اور اس میں یہ بھی تھا کہ آپ صلی اللہ تعالیٰ علیہ وآلہ وسلم نے ارشاد فرمایا: ان کی دائیں جانب سے اور وضو کے اعضاء سے شروع کرو۔ اور اس میں یہ بھی تھا کہ حضرت اُمّ عطیہ رضی اللہ تعالیٰ عنہا نے فرمایا: ہم نے ان کے بالوں کی تین چٹیاں کر دیں۔