Urdu Translation

حضرت اُمّ المؤمنین صفیہ بنت حیی رضی اللہ تعالیٰ عنہا فرماتی ہیں کہ نبی کریم صلی اللہ تعالیٰ علیہ وآلہ وسلم اعتکاف میں تھے۔ میں رات کو آپ سے ملنے آئی، آپ سے باتیں کیں پھر واپسی کے لیے کھڑی ہوئی تو آپ صلی اللہ تعالیٰ علیہ وآلہ وسلم مجھے چھوڑنے کھڑے ہوئے۔ اتنے میں انصار کے دو آدمی گزرے۔ جب انہوں نے نبی کریم صلی اللہ تعالیٰ علیہ وآلہ وسلم کو دیکھا تو تیز چلنے لگے۔ آپ صلی اللہ تعالیٰ علیہ وآلہ وسلم نے فرمایا: ٹھہرو! یہ صفیہ بنت حیی ہیں۔ انہوں نے عرض کیا: سبحان اللہ! یا رسول اللہ! آپ صلی اللہ تعالیٰ علیہ وآلہ وسلم نے ارشاد فرمایا: شیطان انسان میں خون کی طرح دوڑتا ہے اور مجھے ڈر ہوا کہ تمہارے دلوں میں کوئی بری بات نہ ڈال دے۔ (متفق علیہ)