Urdu Translation

ہم سے عبدان نے بیان کیا، کہا کہ مجھے میرے والد حضرت عثمان نے خبر دی، انہیں شعبہ نے، انہیں قیس بن مسلم نے، انہیں طارق بن شہاب نے اور ان سے حضرت ابوموسیٰ رضی اللہ تعالیٰ عنہ نے فرمایا کہ میں رسول اللہ صلی اللہ تعالیٰ علیہ وآلہ وسلم کی خدمت میں حاضر ہوا تو آپ صلی اللہ تعالیٰ علیہ وآلہ وسلم بطحاء میں تشریف فرما تھے (جو مکہ مکرمہ کے قریب ایک جگہ ہے)۔ آپ صلی اللہ تعالیٰ علیہ وآلہ وسلم نے دریافت فرمایا: کیا تو نے حج کی نیت فرمائی ہے؟ میں نے عرض کیا کہ ہاں۔ آپ صلی اللہ تعالیٰ علیہ وآلہ وسلم نے دریافت فرمایا کہ تو نے احرام کس چیز کا باندھا ہے؟ میں نے عرض کیا کہ نبی کریم صلی اللہ تعالیٰ علیہ وآلہ وسلم کے احرام کی طرح باندھا ہے۔ آپ صلی اللہ تعالیٰ علیہ وآلہ وسلم نے ارشاد فرمایا کہ تو نے اچھا کیا، اب جا۔ چنانچہ (مکہ مکرمہ تشریف لا کر) میں نے بیت اللہ کا طواف فرمایا اور صفا و مروہ کی سعی فرمائی، پھر میں بنو قیس کی ایک خاتون کے پاس آیا اور انہوں نے میرے سر کی جوئیں نکالیں۔ اس کے بعد میں نے حج کی لبیک پکاری۔ اس کے بعد میں حضرت عمر رضی اللہ تعالیٰ عنہ کے عہد خلافت تک اسی کا فتویٰ دیتا رہا، پھر جب میں نے حضرت عمر رضی اللہ تعالیٰ عنہ سے اس کا ذکر فرمایا تو آپ رضی اللہ تعالیٰ عنہ نے ارشاد فرمایا کہ ہمیں کتاب اللہ پر بھی عمل کرنا چاہیے اور اس میں پورا کرنے کا حکم ہے، پھر رسول اللہ صلی اللہ تعالیٰ علیہ وآلہ وسلم کی سنت پر بھی عمل کرنا چاہیے اور نبی کریم صلی اللہ تعالیٰ علیہ وآلہ وسلم قربانی سے پہلے حلال نہیں ہوئے تھے۔