الترجمة الأردية

حضرت ایوب انصاری رضی اللہ تعالیٰ عنہ کے آزاد کردہ غلام افلح نے حضرت ایوب انصاری رضی اللہ تعالیٰ عنہ سے روایت کی کہ نبی کریم صلی اللہ تعالیٰ علیہ وآلہ وسلم ان کے ہاں مہمان ٹھرے تو آپ صلی اللہ تعالیٰ علیہ وآلہ وسلم نیچے کے مکان میں رہے اور سیدنا حضرت ابوایوب رضی اللہ تعالیٰ عنہ اوپر کے درجہ میں تھے ۔ ایک دفعہ سیدنا حضرت ابوایوب رضی اللہ تعالیٰ عنہ رات کو جاگے اور کہا کہ ہم رسول اللہ صلی اللہ تعالیٰ علیہ وآلہ وسلم کے سر کے اوپر چلا کرتے ہیں ، پھر ہٹ کر رات کو ایک کونے میں ہو گئے ۔ پھر اس کے بعد سیدنا حضرت ابوایوب رضی اللہ تعالیٰ عنہ نے آپ صلی اللہ تعالیٰ علیہ وآلہ وسلم سے اوپر جانے کے لئے کہا تو آپ صلی اللہ تعالیٰ علیہ وآلہ وسلم نے ارشاد فرمایا کہ نیچے کا مکان آرام کا ہے ( رہنے والوں کے لئے اور آنے والوں کے لئے اور اسی لئے رسول اللہ نیچے کے مکان میں رہتے تھے ) ۔ سیدنا حضرت ابوایوب رضی اللہ تعالیٰ عنہ نے کہا میں اس چھت پر نہیں رہ سکتا جس کے نیچے آپ صلی اللہ تعالیٰ علیہ وآلہ وسلم ہوں ۔ یہ سن کر آپ صلی اللہ تعالیٰ علیہ وآلہ وسلم اوپر کے درجہ میں تشریف لے گئے اور حضرت ابوایوب رضی اللہ تعالیٰ عنہ نیچے کے درجے میں آ گئے ۔ سیدنا حضرت ابوایوب رضی اللہ تعالیٰ عنہ رسول اللہ صلی اللہ تعالیٰ علیہ وآلہ وسلم کے لئے کھانا تیار کرتے تھے ، پھر جب آپ صلی اللہ تعالیٰ علیہ وآلہ وسلم کے پاس کھانا آتا ( اور آپ صلی اللہ تعالیٰ علیہ وآلہ وسلم اس میں سے کھاتے اور اس کے بعد بچا ہوا کھانا واپس جاتا ) تو سیدنا حضرت ابوایوب رضی اللہ تعالیٰ عنہ ( آدمی سے ) پوچھتے کہ آپ صلی اللہ تعالیٰ علیہ وآلہ وسلم کی انگلیاں کھانے کی کس جگہ پر لگی ہیں اور وہ وہیں سے ( برکت کے لئے ) کھاتے ۔ ایک دن سیدنا حضرت ابوایوب رضی اللہ تعالیٰ عنہ نے کھانا پکایا ، جس میں لہسن تھا ۔ جب کھانا واپس گیا تو سیدنا حضرت ابوایوب رضی اللہ تعالیٰ عنہ نے پوچھا کہ آپ صلی اللہ تعالیٰ علیہ وآلہ وسلم کی انگلیاں کہاں لگی تھیں؟ انہیں بتایا گیا کہ آپ صلی اللہ تعالیٰ علیہ وآلہ وسلم نے کھانا نہیں کھایا ۔ یہ سن کر سیدنا حضرت ابوایوب رضی اللہ تعالیٰ عنہ گھبرا گئے اور اوپر گئے اور پوچھا کہ کیا لہسن حرام ہے؟ آپ صلی اللہ تعالیٰ علیہ وآلہ وسلم نے ارشاد فرمایا کہ نہیں ، لیکن میں اسے ناپسند کرتا ہوں ۔ سیدنا حضرت ابوایوب رضی اللہ تعالیٰ عنہ نے کہا جو چیز آپ صلی اللہ تعالیٰ علیہ وآلہ وسلم کو ناپسند ہے ، مجھے بھی ناپسند ہے ۔ سیدنا حضرت ابوایوب رضی اللہ تعالیٰ عنہ نے کہا کہ رسول اللہ صلی اللہ تعالیٰ علیہ وآلہ وسلم کے پاس ( فرشتے ) آتے تھے ( اور فرشتوں کو لہسن کی بو سے تکلیف ہوتی اس لئے آپ صلی اللہ تعالیٰ علیہ وآلہ وسلم نہ کھاتے ) ۔