الترجمة الأردية

حضرت ابوہریرہ رضی اللہ تعالیٰ عنہ سے روایت ہے کہ رسول اللہ صلی اللہ تعالیٰ علیہ وآلہ وسلم نے ارشاد فرمایا: جب اللہ نے آدم علیہ السلام کو پیدا فرمایا تو ان کی پشت پر ہاتھ پھیرا اور ان کی ہر اولاد جو قیامت تک پیدا ہونے والی تھی ان کی پشت سے گری۔ ہر ایک کی پیشانی پر نور کی چمک لگائی پھر انہیں آدم علیہ السلام کے سامنے پیش کیا۔ آدم علیہ السلام نے عرض کیا: اے رب! یہ کون ہیں؟ فرمایا: یہ تمہاری اولاد ہے۔ ان میں سے ایک شخص کو دیکھا جس کی آنکھوں کے درمیان نور کی چمک انہیں بہت بھائی تو عرض کیا: اے رب! یہ کون ہے؟ فرمایا: یہ تمہاری اولاد میں سے ایک شخص ہے جسے داؤد کہتے ہیں۔ آدم علیہ السلام نے عرض کیا: اے رب! اس کی عمر کتنی رکھی ہے؟ فرمایا: ساٹھ سال۔ عرض کیا: اے رب! اس کی عمر میں اضافہ فرما دیجیے۔ فرمایا: نہیں، مگر یہ کہ میں تمہاری عمر سے اضافہ کروں۔ آدم علیہ السلام کی عمر ایک ہزار سال رکھی گئی تھی، اللہ نے ان کی عمر سے چالیس سال داؤد کو دے دیے۔ اللہ تعالیٰ نے اس پر تحریر فرمایا اور فرشتوں کو گواہ بنایا۔ جب آدم علیہ السلام کی عمر پوری ہوئی تو ملک الموت آیا، آدم علیہ السلام نے فرمایا: ابھی تو میری عمر کے چالیس سال باقی ہیں۔ ان سے کہا گیا: کیا آپ نے وہ چالیس سال اپنے بیٹے داؤد کو نہیں دیے تھے؟ آدم علیہ السلام نے انکار کیا اور ان کی اولاد نے بھی انکار کیا، آدم بھولے اور ان کی اولاد بھی بھولی۔ (ترمذی)