الترجمة الأردية

حضرت ابو سعید خدری اور حضرت ابو ہریرہ رضی اللہ تعالیٰ عنہما سے روایت ہے کہ رسول اللہ صلی اللہ تعالیٰ علیہ وآلہ وسلم نے فرمایا: جب بندہ کہتا ہے: لَا إِلَهَ إِلَّا اللَّهُ وَاللَّهُ أَکْبَرُ (اللہ کے سوا کوئی معبود نہیں اور اللہ سب سے بڑا ہے) تو اس کا رب اس کی تصدیق فرماتا ہے اور کہتا ہے: میرے بندے نے سچ کہا، میرے سوا کوئی معبود نہیں اور میں ہی سب سے بڑا ہوں۔ اور جب وہ کہتا ہے: لَا إِلَهَ إِلَّا اللَّهُ وَحْدَهُ (اللہ کے سوا کوئی معبود نہیں، وہ اکیلا ہے) تو اس کا رب اس کی تصدیق فرماتا ہے اور کہتا ہے: میرے بندے نے سچ کہا، میرے سوا کوئی معبود نہیں اور میں اکیلا ہوں۔ اور جب وہ کہتا ہے: لَا إِلَهَ إِلَّا اللَّهُ لَا شَرِيکَ لَهُ (اللہ کے سوا کوئی معبود نہیں، اس کا کوئی شریک نہیں) تو اس کا رب اس کی تصدیق فرماتا ہے اور کہتا ہے: میرے بندے نے سچ کہا، میرے سوا کوئی معبود نہیں، میرا کوئی شریک نہیں۔ اور جب وہ کہتا ہے: لَا إِلَهَ إِلَّا اللَّهُ لَهُ الْمُلْکُ (اللہ کے سوا کوئی معبود نہیں، اسی کی بادشاہی ہے) تو اس کا رب اس کی تصدیق فرماتا ہے اور کہتا ہے: میرے بندے نے سچ کہا، میرے سوا کوئی معبود نہیں، میری ہی بادشاہی ہے اور میرے ہی لیے تعریف ہے۔ اور جب وہ کہتا ہے: لَا إِلَهَ إِلَّا اللَّهُ لَا حَوْلَ وَلَا قُوَّةَ إِلَّا بِاللَّهِ (اللہ کے سوا کوئی معبود نہیں، کوئی طاقت اور قوت نہیں مگر اللہ کی طرف سے) تو اس کا رب اس کی تصدیق فرماتا ہے اور کہتا ہے: میرے بندے نے سچ کہا، میرے سوا کوئی معبود نہیں اور کوئی طاقت اور قوت نہیں مگر میری طرف سے۔