الترجمة الأردية

ہم سے عبدالعزیز بن عبداللہ نے بیان کیا، کہا ہم سے ابراہیم بن سعد نے بیان کیا، ان سے صالح بن کیسان نے، ان سے ابن شہاب نے بیان کیا کہ مجھے سالم بن عبداللہ نے خبر دی، انہوں نے حضرت عبداللہ بن عمر سے حضرت عمر بن خطاب رضی اللہ تعالیٰ عنہم کے متعلق سنا کہ جب ( ان کی صاحبزادی ) حفصہ بنت عمر رضی اللہ تعالیٰ عنہا ( اپنے شوہر ) خنیس بن حذافہ سہمی کی وفات کی وجہ سے بیوہ ہو گئیں اور خنیس رسول اللہ صلی اللہ تعالیٰ علیہ وآلہ وسلم کے صحابی تھے اور ان کا وصال مدینہ منورہ میں ہوئی تھی۔ حضرت عمر بن خطاب رضی اللہ تعالیٰ عنہ نے بیان کیا کہ میں حضرت عثمان بن عفان رضی اللہ تعالیٰ عنہ کے پاس آیا اور ان کے لیے حفصہ رضی اللہ تعالیٰ عنہا کو پیش کیا۔ انہوں نے کہا کہ میں اس معاملہ میں غور کروں گا۔ میں نے کچھ دنوں تک انتظار کیا۔ پھر مجھ سے حضرت ابوبکر رضی اللہ تعالیٰ عنہ نے ملاقات کی اور میں نے کہا کہ اگر آپ پسند کریں تو میں آپ کی شادی حفصہ رضی اللہ تعالیٰ عنہا سے کر دوں۔ حضرت ابوبکر رضی اللہ تعالیٰ عنہ خاموش رہے اور مجھے کوئی جواب نہیں دیا۔ ان کی اس بےرخی سے مجھے حضرت عثمان رضی اللہ تعالیٰ عنہ کے معاملہ سے بھی زیادہ رنج ہوا۔ کچھ دنوں تک میں خاموش رہا۔ پھر نبی کریم صلی اللہ تعالیٰ علیہ وآلہ وسلم نے خود حفصہ رضی اللہ تعالیٰ عنہا سے نکاح کا پیغام بھیجا اور میں نے نبی کریم صلی اللہ تعالیٰ علیہ وآلہ وسلم سے اس کی شادی کر دی۔ اس کے بعد حضرت ابوبکر رضی اللہ تعالیٰ عنہ مجھ سے ملے اور کہا کہ جب تم نے حفصہ رضی اللہ تعالیٰ عنہا کا معاملہ میرے سامنے پیش کیا تھا تو میرے اس پر میرے خاموش رہنے سے تمہیں تکلیف ہوئی ہو گی کہ میں نے تمہیں اس کا کوئی جواب نہیں دیا تھا۔ عمر رضی اللہ تعالیٰ عنہ نے بیان کیا کہ میں نے کہا کہ واقعی ہوئی تھی۔ حضرت ابوبکر رضی اللہ تعالیٰ عنہ نے کہا کہ تم نے جو کچھ میرے سامنے رکھا تھا، اس کا جواب میں نے صرف اس وجہ سے نہیں دیا تھا کہ میرے علم میں تھا کہ رسول اللہ صلی اللہ تعالیٰ علیہ وآلہ وسلم نے خود حفصہ رضی اللہ تعالیٰ عنہا کا ذکر کیا ہے اور میں نبی کریم صلی اللہ تعالیٰ علیہ وآلہ وسلم کے راز کو ظاہر کرنا نہیں چاہتا تھا اگر نبی کریم صلی اللہ تعالیٰ علیہ وآلہ وسلم چھوڑ دیتے تو میں حفصہ کو اپنے نکاح میں لے آتا۔