الترجمة الأردية

ہم سے عبداللہ بن یوسف نے بیان کیا، کہا ہم کو امام مالک رحمۃ اللہ تعالیٰ علیہ نے خبر دی، انہیں ابن شہاب نے، انہیں عیسیٰ بن حضرت طلحہ نے، انہیں حضرت عبداللہ بن عمرو رضی اللہ تعالیٰ عنہما نے فرمایا کہ رسول اللہ صلی اللہ تعالیٰ علیہ وآلہ وسلم حجۃ الوداع کے موقع پر (اپنی سواری پر) کھڑے ہوئے تھے اور لوگ آپ صلی اللہ تعالیٰ علیہ وآلہ وسلم سے مسائل معلوم کیے جا رہے تھے۔ ایک شخص نے عرض کیا: یا رسول اللہ! مجھے معلوم نہ تھا اور میں نے قربانی کرنے سے پہلے ہی سر منڈا لیا، آپ صلی اللہ تعالیٰ علیہ وآلہ وسلم نے ارشاد فرمایا: اب قربانی کر لو کوئی حرج نہیں، پھر دوسرا شخص تشریف لایا اور عرض کیا: یا رسول اللہ! مجھے خیال نہ رہا اور رمی جمار سے پہلے ہی میں نے قربانی کر دی، آپ صلی اللہ تعالیٰ علیہ وآلہ وسلم نے ارشاد فرمایا: اب رمی کر لو کوئی حرج نہیں، اس دن آپ صلی اللہ تعالیٰ علیہ وآلہ وسلم سے جس چیز کے آگے پیچھے کرنے کے متعلق سوال ہوا آپ صلی اللہ تعالیٰ علیہ وآلہ وسلم نے یہی ارشاد فرمایا: اب کر لو کوئی حرج نہیں۔