الترجمة الأردية

ہم سے احمد نے بیان کیا، کہا ہم سے عبداللہ بن وہب نے بیان کیا، ہمیں ابن جریج نے خبر دی کہ ایوب نے انہیں خبر دی، فرمایا کہ میں نے ابن سیرین سے سنا، انہوں نے فرمایا کہ حضرت اُمّ عطیہ رضی اللہ تعالیٰ عنہا تشریف لائیں جو انصار کی ان خواتین میں سے تھیں جنہوں نے (نبی کریم صلی اللہ تعالیٰ علیہ وآلہ وسلم سے) بیعت کی تھی۔ وہ بصرہ اپنے ایک بیٹے کی تلاش میں آئی تھیں لیکن وہ نہ مل سکا۔ پھر انہوں نے ہم سے بیان کیا کہ نبی کریم صلی اللہ تعالیٰ علیہ وآلہ وسلم ہمارے پاس تشریف لائے اور ہم آپ صلی اللہ تعالیٰ علیہ وآلہ وسلم کی صاحبزادی کو غسل دے رہی تھیں۔ آپ صلی اللہ تعالیٰ علیہ وآلہ وسلم نے ارشاد فرمایا: انہیں تین بار یا پانچ بار یا اگر تم مناسب سمجھو تو اس سے زیادہ بار پانی اور بیری کے پتوں سے غسل دو اور آخری بار کافور ملا دو۔ جب فارغ ہو جاؤ تو مجھے اطلاع دو۔ انہوں نے فرمایا: جب ہم فارغ ہوئیں تو آپ صلی اللہ تعالیٰ علیہ وآلہ وسلم نے اپنا ازار ہمیں عنایت فرمایا اور ارشاد فرمایا: اسے ان کے بدن سے لپیٹ دو۔ اس سے زیادہ آپ صلی اللہ تعالیٰ علیہ وآلہ وسلم نے کچھ نہیں فرمایا۔ اور مجھے نہیں معلوم کہ آپ صلی اللہ تعالیٰ علیہ وآلہ وسلم کی کون سی صاحبزادی تھیں۔ (ایوب نے فرمایا) اور ابن سیرین نے بتایا کہ «إشعار» کا مطلب یہ ہے کہ اس میں نعش لپیٹ دی جائے۔ اسی طرح ابن سیرین رحمۃ اللہ تعالیٰ علیہ فرمایا کرتے تھے کہ عورت کے بدن پر اسے لپیٹا جائے، ازار کے طور پر نہ باندھا جائے۔