الترجمة الأردية

حضرت اُمّ المؤمنین عائشہ صدیقہ رضی اللہ تعالیٰ عنہا فرماتی ہیں: لوگوں نے رسول اللہ صلی اللہ تعالیٰ علیہ وآلہ وسلم سے بارش نہ ہونے کی شکایت کی — آپ صلی اللہ تعالیٰ علیہ وآلہ وسلم نے منبر منگوایا اور عیدگاہ میں رکھوایا اور لوگوں سے ایک دن کا وعدہ فرمایا کہ نکلیں گے۔ حضرت اُمّ المؤمنین عائشہ رضی اللہ تعالیٰ عنہا فرماتی ہیں: جب سورج کا کنارا نمودار ہوا تو رسول اللہ صلی اللہ تعالیٰ علیہ وآلہ وسلم تشریف لے نکلے — منبر پر تشریف فرما ہوئے — تکبیر کہی اور اللہ عزّ وجل کی حمد فرمائی — پھر ارشاد فرمایا: تم نے اپنے دیار کی خشک سالی اور بارش کے وقت پر نہ آنے کی شکایت کی ہے — اللہ عزّ وجل نے تمہیں حکم دیا ہے کہ اسے پکارو اور وعدہ فرمایا ہے کہ تمہاری دعا قبول فرمائے گا — پھر فرمایا: اَلْحَمْدُ لِلّٰہِ رَبِّ الْعٰلَمِیْنَ الرَّحْمٰنِ الرَّحِیْمِ مٰلِکِ یَوْمِ الدِّیْنِ — لَا اِلٰہَ اِلَّا اللہُ یَفْعَلُ مَا یُرِیْدُ — اَللّٰھُمَّ اَنْتَ اللہُ لَا اِلٰہَ اِلَّا اَنْتَ الْغَنِیُّ وَنَحْنُ الْفُقَرَآءُ — اَنْزِلْ عَلَیْنَا الْغَیْثَ وَاجْعَلْ مَا اَنْزَلْتَ لَنَا قُوَّةً وَبَلَاغًا اِلٰی حِیْنٍ (اے اللہ! تو ہی اللہ ہے تیرے سوا کوئی معبود نہیں — تو بے نیاز ہے اور ہم محتاج ہیں — ہم پر بارش نازل فرما اور جو نازل فرمائے اسے ہمارے لیے طاقت اور ایک وقت تک کفایت بنا دے)۔ پھر اپنے ہاتھ بلند فرمائے اور اتنے اونچے اٹھاتے رہے کہ بغلوں کی سفیدی نظر آئی — پھر لوگوں کی طرف پیٹھ فرمائی اور اپنی چادر پلٹی — ہاتھ اٹھائے ہوئے — پھر لوگوں کی طرف متوجہ ہوئے اور منبر سے اترے — دو رکعتیں پڑھیں — اللہ نے بادل اٹھایا — گرجا اور چمکا — پھر اللہ کے حکم سے بارش ہوئی — ابھی آپ صلی اللہ تعالیٰ علیہ وآلہ وسلم مسجد تک نہیں پہنچے تھے کہ سیلاب بہنے لگے — جب آپ صلی اللہ تعالیٰ علیہ وآلہ وسلم نے دیکھا کہ لوگ جلدی سے سائبانوں کی طرف بھاگ رہے ہیں تو ہنسے یہاں تک کہ آپ صلی اللہ تعالیٰ علیہ وآلہ وسلم کی داڑھیں نظر آئیں — پھر ارشاد فرمایا: میں گواہی دیتا ہوں کہ اللہ ہر چیز پر قادر ہے اور میں اللہ کا بندہ اور رسول ہوں۔ حضرت ابوداؤد رحمۃ اللہ تعالیٰ علیہ نے فرمایا: یہ حدیث غریب ہے، اس کی سند اچھی ہے — اہلِ مدینہ مٰلِکِ یَوْمِ الدِّیْنِ پڑھتے ہیں اور یہ حدیث ان کی حجت ہے۔