اردو ترجمہ

حضرت ابو ہریرہ رضی اللہ تعالیٰ عنہ سے روایت ہے کہ حضور نبی اکرم صلی اللہ تعالیٰ علیہ وآلہ وسلم نے ارشاد فرمایا: جب اللہ تعالیٰ کسی بندے سے محبت فرماتا ہے تو حضرت جبریل علیہ السلام کو بلاتا ہے اور فرماتا ہے: میں فلاں سے محبت کرتا ہوں، تم بھی اس سے محبت کرو۔ تو جبریل علیہ السلام اس سے محبت کرتے ہیں۔ پھر آسمان والوں میں ندا دیتے ہیں: اللہ تعالیٰ فلاں سے محبت فرماتا ہے، تم بھی اس سے محبت کرو۔ تو اہلِ آسمان اس سے محبت کرتے ہیں اور زمین میں بھی اس کے لیے قبولیت رکھ دی جاتی ہے۔ اور جب اللہ تعالیٰ کسی بندے سے ناراض ہوتا ہے تو جبریل علیہ السلام کو بلاتا ہے اور فرماتا ہے: میں فلاں سے ناراض ہوں، تم بھی اس سے ناراض ہو جاؤ۔ تو جبریل اس سے ناراض ہوتے ہیں۔ پھر اہلِ آسمان میں ندا دیتے ہیں: اللہ تعالیٰ فلاں سے ناراض ہے، تم بھی اس سے ناراض ہو جاؤ۔ تو وہ اس سے ناراض ہو جاتے ہیں اور زمین میں بھی اس کے لیے نفرت رکھ دی جاتی ہے۔ اسے امام مسلم نے روایت کیا (نیز بخاری، مالک اور ترمذی نے بھی)۔