اردو ترجمہ

حضرت عمر بن خطاب رضی اللہ تعالیٰ عنہ فرماتے ہیں کہ صحابی رسول خنیس بن حذافہ سہمی رضی اللہ تعالیٰ عنہ کا مدینہ میں انتقال ہو گیا، ان کے انتقال سے حفصہ بنت عمر رضی اللہ تعالیٰ عنہا بیوہ ہو گئیں، عمر رضی اللہ تعالیٰ عنہ فرماتے ہیں: میں حضرت عثمان بن عفان رضی اللہ تعالیٰ عنہ کے پاس آیا اور حفصہ رضی اللہ تعالیٰ عنہا کا معاملہ ان کے سامنے پیش کیا، اور کہا کہ اگر آپ پسند کریں تو میں آپ کی شادی حفصہ سے کر دیتا ہوں، انہوں نے کہا: میں اپنے بارے میں غور کر کے بتاؤں گا، میں کئی دن ٹھہرا ( انتظار کرتا ) رہا، پھر وہ مجھ سے ملے اور کہا: میرے غور و فکر میں یہی آیا ہے کہ میں ان دنوں شادی نہ کروں۔ عمر رضی اللہ تعالیٰ عنہ فرماتے ہیں: پھر میں حضرت ابوبکر رضی اللہ تعالیٰ عنہ سے ملا اور کہا: اگر آپ پسند کریں تو حفصہ سے آپ کی شادی کر دوں، ( یہ سن کر ) حضرت ابوبکر رضی اللہ تعالیٰ عنہ خاموش رہے، اور مجھے کچھ بھی جواب نہ دیا۔ مجھے ان پر حضرت عثمان رضی اللہ تعالیٰ عنہ کے مقابل میں زیادہ ہی غصہ آیا، پھر چند ہی راتیں گزری تھیں کہ رسول اللہ صلی اللہ تعالیٰ علیہ وآلہ وسلم نے ان سے اپنے لیے نکاح کا پیغام دیا تو میں نے ان کا نکاح آپ صلی اللہ تعالیٰ علیہ وآلہ وسلم کے ساتھ کر دیا۔ پھر مجھے حضرت ابوبکر رضی اللہ تعالیٰ عنہ ملے اور کہا: غالباً آپ کو اس وقت بڑا غصہ آیا ہو گا جب آپ نے مجھے حفصہ سے نکاح کی پیشکش کی تھی اور ( میری جانب سے ) آپ کو کوئی جواب نہ ملا، عمر رضی اللہ تعالیٰ عنہ فرماتے ہیں: میں نے کہا: ہاں، حضرت ابوبکر رضی اللہ تعالیٰ عنہ نے بتلایا کہ آپ کی پیش کش کا جواب نہ دینے کی وجہ یہ تھی کہ مجھے معلوم تھا کہ نبی اکرم صلی اللہ تعالیٰ علیہ وآلہ وسلم حفصہ کا ذکر فرما چکے تھے اور میں آپ کا راز فاش کرنے والا نہیں تھا۔ اگر رسول اللہ صلی اللہ تعالیٰ علیہ وآلہ وسلم ان سے شادی نہ کرتے تو میں انہیں قبول کر لیتا۔