اردو ترجمہ

حضرت ابووائل شقیق بن سلمہ فرماتے ہیں کہ میں حضرت عبداللہ بن مسعود اور حضرت ابوموسیٰ اشعری رضی اللہ تعالیٰ عنہم کے ساتھ بیٹھا ہوا تھا، تو حضرت ابوموسیٰ نے کہا: ۱؎ آپ نے عمار رضی اللہ تعالیٰ عنہ کی بات جو انہوں نے عمر رضی اللہ تعالیٰ عنہ سے کہی نہیں سنی کہ مجھے رسول اللہ صلی اللہ تعالیٰ علیہ وآلہ وسلم نے کسی ضرورت سے بھیجا، تو میں جنبی ہو گیا، اور مجھے پانی نہیں ملا، تو میں نے مٹی میں لوٹ پوٹ لیا، پھر میں آپ صلی اللہ تعالیٰ علیہ وآلہ وسلم کے پاس آیا، تو آپ سے اس کا ذکر کیا، تو آپ صلی اللہ تعالیٰ علیہ وآلہ وسلم نے ارشاد فرمایا: تمہارے لیے بس اس طرح کر لینا ہی کافی تھا ، اور آپ نے اپنا دونوں ہاتھ زمین پر ایک بار مارا، اور اپنی دونوں ہتھیلیوں کا مسح کیا، پھر انہیں جھاڑا، پھر آپ نے اپنی بائیں ( ہتھیلی ) سے اپنی داہنی ( ہتھیلی ) پر اور داہنی ہتھیلی سے اپنی بائیں ( ہتھیلی ) پر مارا، اور اپنی دونوں ہتھیلیوں اور اپنے چہرے کا مسح کیا، حضرت عبداللہ بن مسعود رضی اللہ تعالیٰ عنہ نے کہا: کیا آپ نے دیکھا نہیں کہ عمر رضی اللہ تعالیٰ عنہ عمار رضی اللہ تعالیٰ عنہ کی بات سے مطمئن نہیں ہوئے؟۔