اردو ترجمہ

سیدنا ابو الدرداء رضی اللہ عنہ سے روایت ہے کہ ہم رسول اللہصلی اللہ علیہ وسلمکے ساتھ تھے، آپصلی اللہ علیہ وسلمنے اپنی نگاہ آسمان کی طرف اٹھائی اور پھر فرمایا:”یہ وہ وقت ہے جب لوگوں سے علم چھین لیا جائے گا، یہاں تک کہ وہ اس میں سے کسی چیز پر قدرت نہیں رکھیں گے“، تو سیدنا زیاد بن لبید انصاری رضی اللہ عنہ نے عرض کیا: یا رسول اللہ! ہم سے علم کیسے چھین لیا جائے گا جبکہ ہم نے قرآن پڑھ لیا ہے؟ اللہ کی قسم! ہم اسے ضرور پڑھیں گے اور اپنی عورتوں اور بچوں کو بھی پڑھائیں گے؛ آپصلی اللہ علیہ وسلمنے فرمایا:”اے زیاد! تیری ماں تجھے گم پائے (عربوں کا ایک محاورہ)، میں تو تجھے اہل مدینہ کے فقہاء میں شمار کرتا تھا، یہ دیکھو تورات اور انجیل یہودیوں اور عیسائیوں کے پاس موجود ہے، تو ان کتابوں نے انہیں کیا فائدہ پہنچایا (جب انہوں نے ان پر عمل چھوڑ دیا)؟“جبیر کہتے ہیں کہ پھر میری ملاقات سیدنا عبادہ بن صامت رضی اللہ عنہ سے ہوئی تو میں نے ان سے کہا: کیا آپ نے نہیں سنا کہ آپ کے بھائی ابو الدرداء کیا کہہ رہے ہیں؟ اور میں نے انہیں وہ بات بتائی جو انہوں نے کہی تھی؛ عبادہ رضی اللہ عنہ نے فرمایا: ابو الدرداء نے سچ کہا، اگر تم چاہو تو میں تمہیں اس پہلے علم کے بارے میں بتا دوں جو لوگوں سے اٹھا لیا جائے گا اور وہ ’خشوع‘ ہے، قریب ہے کہ تم جامع مسجد میں داخل ہو اور تمہیں وہاں کوئی ایک شخص بھی خاشع نظر نہ آئے۔یہ مصریوں کی روایت سے ایک صحیح سند ہے، اور اس میں حدیث کی صحت پر چوتھا شاہد سیدنا عبادہ بن صامت رضی اللہ عنہ ہیں، اور شاید کسی کو یہ وہم ہو کہ جبیر بن نفیر نے اسے کبھی عوف بن مالک سے اور کبھی ابو الدرداء سے روایت کیا ہے جس سے یہ حدیث معلول ہو جائے گی، حالانکہ ایسا نہیں ہے، کیونکہ دونوں اسناد کے راوی ثقہ ہیں اور جبیر بن نفیر شامی تابعین کے اکابر میں سے ہیں، پس جب ان سے دونوں اسناد کے ساتھ یہ حدیث صحیح ثابت ہے تو واضح ہے کہ انہوں نے اسے دونوں صحابہ سے سنا ہے، اور اس کی واضح دلیل یہ ہے کہ یہی حدیث صحیح سند کے ساتھ زیاد بن لبید انصاری رضی اللہ عنہ سے بھی مروی ہے جن کا ذکر دونوں حدیثوں میں رسول اللہصلی اللہ علیہ وسلمسے مکالمے کے حوالے سے آیا ہے۔[المستدرك على الصحيحين/كتاب العلم/حدیث: 342]