اردو ترجمہ

حضرت براء (بن عازب) رضی اللہ تعالیٰ عنہ سے روایت ہے کہ نبی کریم صلی اللہ تعالیٰ علیہ وآلہ وسلم جب مدینہ منورہ تشریف لائے تو سب سے پہلے انصار میں سے اپنے ننہیال میں اترے۔ اور آپ صلی اللہ تعالیٰ علیہ وآلہ وسلم نے سولہ یا سترہ ماہ بیت المقدس کی طرف رخ کر کے نماز ادا فرمائی، اور آپ کی خواہش تھی کہ آپ کا قبلہ بیت اللہ (کعبہ) کی طرف ہو۔ (جب حکم آیا تو) سب سے پہلی نماز جو آپ صلی اللہ تعالیٰ علیہ وآلہ وسلم نے کعبے کی طرف رخ کر کے پڑھی وہ عصر کی نماز تھی اور لوگوں نے بھی آپ کے ساتھ نماز ادا کی۔ پھر آپ کے ساتھ نماز پڑھنے والوں میں سے ایک شخص نکلا اور ایک مسجد کے لوگوں کے پاس سے گزرا جو رکوع میں تھے، اس نے کہا: میں اللہ کی قسم کھا کر گواہی دیتا ہوں کہ میں نے رسول اللہ صلی اللہ تعالیٰ علیہ وآلہ وسلم کے ساتھ مکے (کعبے) کی طرف رخ کر کے نماز پڑھی ہے۔ تو وہ لوگ اسی حالت میں بیت اللہ کی طرف گھوم گئے۔ یہود اور اہلِ کتاب کو خوشی ہوتی تھی جب آپ صلی اللہ تعالیٰ علیہ وآلہ وسلم بیت المقدس کی طرف رخ کر کے نماز پڑھتے تھے، مگر جب آپ نے بیت اللہ کی طرف رخ پھیر لیا تو انہیں ناگوار ہوا۔ زہیر (راوی) فرماتے ہیں کہ ابو اسحاق نے براء سے اس حدیث میں یہ بھی نقل کیا کہ قبلے کی تبدیلی سے پہلے کچھ مسلمان (پچھلے قبلے کی طرف نماز پڑھتے ہوئے) وفات پا چکے تھے یا شہید ہو چکے تھے، تو ہمیں معلوم نہ ہو سکا کہ ان کی نمازوں کے بارے میں کیا کہیں۔ تب اللہ تعالیٰ نے یہ آیت نازل فرمائی: «وَمَا كَانَ اللَّهُ لِيُضِيعَ إِيمَانَكُمْ» (اللہ تمہارا ایمان (یعنی تمہاری نمازیں) ضائع نہیں کرے گا)۔