اردو ترجمہ

ہم سے عمر بن حفص بن غیاث نے بیان کیا، کہا ہم سے میرے والد نے بیان کیا، کہا ہم سے اعمش نے بیان کیا، کہا مجھ سے شعبی نے بیان کیا، انہوں نے حضرت نعمان بن بشیر رضی اللہ تعالیٰ عنہما کو فرماتے سنا: نبی کریم صلی اللہ تعالیٰ علیہ وآلہ وسلم نے ارشاد فرمایا: اللہ تعالیٰ کی حدود میں نرمی برتنے والے اور ان میں واقع ہونے والے کی مثال ایسی قوم کی ہے جنہوں نے ایک کشتی میں قرعہ ڈالا، بعض لوگوں کو نچلا حصہ ملا اور بعض کو اوپر کا حصہ۔ جو نچلے حصے میں تھے وہ اوپر والوں کے پاس سے پانی لے کر گزرتے تھے تو اوپر والوں کو تکلیف ہوتی تھی۔ ایک شخص نے کلہاڑی پکڑی اور کشتی کا نچلا حصہ چھیدنے لگا۔ اوپر والے اس کے پاس آئے اور کہا: تجھے کیا ہو گیا ہے؟ اس نے کہا: تمہیں مجھ سے تکلیف ہوتی ہے اور مجھے پانی کی ضرورت ہے۔ اگر وہ اس کا ہاتھ پکڑ لیں تو اسے بھی بچا لیں گے اور خود بھی بچ جائیں گے، اور اگر اسے چھوڑ دیں تو اسے بھی ہلاک کر دیں گے اور خود بھی ہلاک ہو جائیں گے۔