اردو ترجمہ

ہم سے عمرو بن علی نے بیان کیا، کہا کہ ہم کو ابوعاصم نے خبر دی، انہیں ابن جریج نے، انہوں نے عطاء سے سنا، انہیں ابوعباس شاعر نے خبر دی، انہوں نے حضرت عبداللہ بن عمرو رضی اللہ تعالیٰ عنہما سے سنا کہ نبی کریم صلی اللہ تعالیٰ علیہ وآلہ وسلم کو معلوم ہوا کہ میں مسلسل روزے رکھتا ہوں اور ساری رات عبادت کرتا ہوں۔ اب یا نبی کریم صلی اللہ تعالیٰ علیہ وآلہ وسلم نے کسی کو میرے پاس بھیجا یا خود میں نے آپ صلی اللہ تعالیٰ علیہ وآلہ وسلم سے ملاقات کی۔ آپ صلی اللہ تعالیٰ علیہ وآلہ وسلم نے دریافت فرمایا: کیا یہ خبر صحیح ہے کہ تو متواتر روزے رکھتا ہے اور ایک بھی نہیں چھوڑتا اور (رات بھر) نماز پڑھتا رہتا ہے؟ روزہ بھی رکھ اور بے روزہ بھی رہ، عبادت بھی کر اور سوؤ بھی، کیونکہ تیری آنکھ کا بھی تجھ پر حق ہے، تیری جان کا بھی تجھ پر حق ہے اور تیری بیوی کا بھی تجھ پر حق ہے۔ حضرت عبداللہ رضی اللہ تعالیٰ عنہ نے فرمایا: مجھ میں اس سے زیادہ کی طاقت ہے۔ آپ صلی اللہ تعالیٰ علیہ وآلہ وسلم نے ارشاد فرمایا: پھر حضرت داؤد علیہ السلام کی طرح روزہ رکھا کر۔ انہوں نے پوچھا: اور وہ کس طرح؟ ارشاد فرمایا: حضرت داؤد علیہ السلام ایک دن روزہ رکھتے تھے اور ایک دن چھوڑ دیا کرتے تھے اور جب دشمن سے مقابلہ ہوتا تو پیٹھ نہیں پھیرتے تھے۔ اس پر حضرت عبداللہ رضی اللہ تعالیٰ عنہ نے عرض کیا: اے اللہ کے نبی! میرے لیے یہ کیسے ممکن ہے (کہ میں پیٹھ پھیر جاؤں)۔ عطاء نے فرمایا: مجھے یاد نہیں (اس حدیث میں) صوم دہر کا کس طرح ذکر ہوا! (البتہ انہیں اتنا یاد تھا کہ) نبی کریم صلی اللہ تعالیٰ علیہ وآلہ وسلم نے ارشاد فرمایا: جو صوم دہر رکھتا ہے اس کا روزہ ہی نہیں، دو مرتبہ (آپ صلی اللہ تعالیٰ علیہ وآلہ وسلم نے یہی ارشاد فرمایا)۔