اردو ترجمہ

ہم سے محمد بن یوسف فریابی نے بیان کیا، کہا کہ ہم سے اسرائیل بن یونس نے بیان کیا، کہا کہ ہم سے ابوجویریہ (حطان بن خفاف) نے بیان کیا کہ حضرت معن بن یزید رضی اللہ تعالیٰ عنہ نے ان سے بیان کیا، انہوں نے فرمایا: میں نے اور میرے والد اور دادا (اخفش بن حبیب) نے رسول اللہ صلی اللہ تعالیٰ علیہ وآلہ وسلم کے دستِ مبارک پر بیعت کی تھی۔ آپ صلی اللہ تعالیٰ علیہ وآلہ وسلم نے میری منگنی بھی کرائی اور آپ ہی نے نکاح بھی پڑھایا تھا اور میں آپ کی خدمت میں ایک مقدمہ لے کر حاضر ہوا تھا۔ وہ یہ کہ میرے والد یزید نے کچھ دینار خیرات کی نیت سے نکالے اور انہیں مسجد میں ایک شخص کے پاس رکھ دیا۔ میں گیا اور میں نے ان کو اس سے لے لیا۔ پھر جب میں انہیں لے کر والد صاحب کے پاس آیا تو انہوں نے فرمایا: اللہ کی قسم! میرا ارادہ تجھے دینے کا نہیں تھا۔ یہی مقدمہ میں رسول اللہ صلی اللہ تعالیٰ علیہ وآلہ وسلم کی خدمت میں لے کر حاضر ہوا اور آپ صلی اللہ تعالیٰ علیہ وآلہ وسلم نے یہ فیصلہ فرمایا: اے یزید! تمہیں اپنی نیت کا ثواب مل گیا، اور اے معن! جو تو نے لے لیا وہ اب تیرا ہو گیا۔