اردو ترجمہ

ہم سے عبداللہ بن محمد مسندی نے بیان کیا، کہا کہ ہم سے ابوعاصم نبیل نے بیان کیا، کہا کہ ہمیں سعدان بن بشر نے خبر دی، کہا کہ ہم سے ابومجاہد سعد طائی نے بیان کیا، کہا کہ ہم سے محل بن خلیفہ طائی نے بیان کیا، کہا کہ میں نے حضرت عدی بن حاتم رضی اللہ تعالیٰ عنہ سے سنا، انہوں نے فرمایا: میں نبی کریم صلی اللہ تعالیٰ علیہ وآلہ وسلم کی خدمت میں موجود تھا کہ دو شخص حاضر ہوئے۔ ایک فقر و فاقہ کی شکایت لیے ہوئے تھا اور دوسرے کو راستوں کے غیر محفوظ ہونے کی شکایت تھی۔ اس پر رسول اللہ صلی اللہ تعالیٰ علیہ وآلہ وسلم نے ارشاد فرمایا: جہاں تک راستوں کے غیر محفوظ ہونے کا تعلق ہے تو بہت جلد ایسا زمانہ آنے والا ہے کہ ایک قافلہ مکہ تک کسی محافظ کے بغیر نکلے گا (اور اسے راستے میں کوئی خطرہ نہ ہو گا)۔ اور رہا فقر و فاقہ تو قیامت اس وقت تک نہیں آئے گی جب تک (مال و دولت کی کثرت کی وجہ سے) یہ حال نہ ہو جائے کہ ایک شخص اپنا صدقہ لے کر تلاش کرے لیکن کوئی اسے لینے والا نہ ملے۔ پھر ضرور تم میں سے ہر ایک اللہ تعالیٰ کے سامنے کھڑا ہو گا — اس کے اور اللہ کے درمیان نہ کوئی پردہ ہو گا اور نہ ترجمانی کے لیے کوئی ترجمان۔ پھر اللہ تعالیٰ اس سے فرمائے گا: کیا میں نے تجھے مال نہیں دیا تھا؟ وہ کہے گا: ہاں۔ پھر فرمائے گا: کیا میں نے تیرے پاس رسول نہیں بھیجا تھا؟ وہ کہے گا: ہاں۔ پھر وہ اپنے دائیں طرف دیکھے گا تو آگ کے سوا کچھ نظر نہیں آئے گا، پھر بائیں طرف دیکھے گا تو ادھر بھی آگ ہی آگ ہو گی۔ پس تمہیں جہنم سے ڈرنا چاہیے خواہ ایک کھجور کے ٹکڑے ہی (کا صدقہ کر کے اس سے اپنا بچاؤ کرو)، اگر یہ بھی میسر نہ آ سکے تو اچھی بات ہی زبان سے نکالو۔