اردو ترجمہ

حضرت عبداللہ بن عباس رضی اللہ تعالیٰ عنہما سے روایت ہے کہ جب اللہ عزوجل نے یہ آیات نازل فرمائیں: «ولا تقربوا مال اليتيم إلا بالتي هي أحسن» یعنی یتیم کے مال کے قریب نہ جاؤ مگر ایسے طریقے سے جو سب سے اچھا ہو (سورۃ الانعام: ۱۵۲)، اور: «إن الذين يأكلون أموال اليتامى ظلمًا» یعنی جو لوگ ظلم سے یتیموں کا مال کھاتے ہیں (سورۃ النساء: ۱۰)، تو جن لوگوں کے پاس یتیم تھے انہوں نے یتیم کا کھانا اپنے کھانے سے اور اس کا پانی اپنے پانی سے الگ کر دیا، تو یتیم کا کھانا بچ جاتا اور رکھا رہتا یہاں تک کہ وہ اسے کھاتا یا وہ خراب ہو جاتا۔ یہ بات لوگوں پر بھاری گزری، انہوں نے رسول اللہ صلی اللہ تعالیٰ علیہ وآلہ وسلم کی بارگاہ میں اس کا ذکر کیا، تو اللہ عزوجل نے یہ آیت نازل فرمائی: «ويسألونك عن اليتامى قل إصلاح لهم خير وإن تخالطوهم فإخوانكم» یعنی آپ سے یتیموں کے بارے میں دریافت کرتے ہیں، فرما دیجیے کہ ان کی اصلاح بہتر ہے، اور اگر تم ان کا مال اپنے مال میں ملا بھی لو تو وہ تمہارے بھائی ہیں (سورۃ البقرہ: ۲۲۰)۔ پھر لوگوں نے اپنا کھانا پینا ان کے کھانے پینے میں ملا لیا۔