Urdu Translation

ہمیں سعید بن عمرو اشعثی نے حدیث سنائی، کہا: ہمیں سفیان بن عیینہ نے حدیث سنائی، انہوں نے مطرف اور (عبد الملک) ابن ابجر سے، انہوں نے شعبی رحمۃ اللہ تعالیٰ علیہ سے روایت کی، کہا: میں نے حضرت مغیرہ بن شعبہ رضی اللہ تعالیٰ عنہ سے ان شاء اللہ (رسول اللہ صلی اللہ تعالیٰ علیہ وآلہ وسلم سے بیان کردہ) روایت کے طور پر سنا۔ نیز ابن ابی عمر نے سفیان سے، انہوں نے مطرف اور عبد الملک بن سعید سے اور ان دونوں نے شعبی رحمۃ اللہ تعالیٰ علیہ سے سن کر حدیث بیان کی، انہوں نے حضرت مغیرہ بن شعبہ رضی اللہ تعالیٰ عنہ کے حوالے سے خبر دی، کہا: میں نے ان سے منبر پر سنا، وہ اس بات کو نبی کریم صلی اللہ تعالیٰ علیہ وآلہ وسلم سے منسوب کر رہے تھے۔ (آپ صلی اللہ تعالیٰ علیہ وآلہ وسلم نے ارشاد فرمایا:) ''موسیٰ علیہ السلام نے اپنے رب سے سوال کیا: جنت والوں میں سب سے کم درجے والا کون ہو گا؟ اللہ تعالیٰ نے فرمایا: وہ ایک آدمی ہو گا جو اہل جنت کے جنت میں داخل ہو جانے کے بعد آئے گا، اس سے کہا جائے گا: جنت میں داخل ہو جا۔ وہ کہے گا: اے میرے رب! کیسے؟ جبکہ لوگ اپنی اپنی منزلوں میں بس چکے ہیں اور اپنے اپنے حصے لے چکے ہیں۔ اس سے کہا جائے گا: کیا تو اس پر راضی ہو جائے گا کہ تجھے دنیا کے بادشاہوں میں سے کسی بادشاہ کی بادشاہت جتنا ملے؟ وہ کہے گا: میں راضی ہوں، اے میرے رب! اللہ فرمائے گا: تیرے لیے وہ ہے اور اس جیسا اور اس جیسا اور اس جیسا اور اس جیسا۔ پانچویں بار کہے گا: میں راضی ہوں، اے میرے رب! اللہ فرمائے گا: یہ اور اس کا دس گنا تیرے لیے ہے، اور تیرے لیے وہ ہے جو تیرے دل نے چاہا اور تیری آنکھ نے لذت محسوس کی۔ وہ کہے گا: میں راضی ہوں، اے میرے رب!'' موسیٰ علیہ السلام نے عرض کیا: اے میرے رب! اور سب سے اونچے درجے والا؟ اللہ تعالیٰ نے فرمایا: وہ وہ لوگ ہیں جنہیں میں نے چاہا، میں نے اپنے ہاتھ سے ان کی کرامت کا پودا لگایا اور اس پر مہر لگا دی، پھر نہ کسی آنکھ نے دیکھا، نہ کسی کان نے سنا اور نہ کسی بشر کے دل میں آیا۔''