Urdu Translation

ہم سے موسیٰ نے بیان کیا، ان سے حضرت ابوعوانہ نے، ان سے فراس نے، ان سے عامر نے، ان سے مسروق نے بیان کیا، کہا مجھ سے حضرت اُمّ المؤمنین عائشہ رضی اللہ تعالیٰ عنہا نے بیان کیا: ہم نبی کریم صلی اللہ تعالیٰ علیہ وآلہ وسلم کی ازواج مطہرات سب آپ کے پاس جمع تھیں، ایک بھی کم نہ تھی۔ اتنے میں سیدہ فاطمۃ الزہرا علیہا السلام چل کر آئیں، واللہ ان کی چال رسول اللہ صلی اللہ تعالیٰ علیہ وآلہ وسلم کی چال سے ذرا بھی مختلف نہ تھی۔ جب آپ صلی اللہ تعالیٰ علیہ وآلہ وسلم نے انہیں دیکھا تو خوشآمدید فرمایا اور کہا: میری بیٹی خوش آمدید! پھر انہیں اپنی دائیں یا بائیں طرف بٹھایا پھر کان میں کوئی بات فرمائی تو وہ زور سے رونے لگیں۔ جب آپ صلی اللہ تعالیٰ علیہ وآلہ وسلم نے ان کا غم دیکھا تو دوسری مرتبہ کان میں بات فرمائی تو وہ ہنسنے لگیں۔ میں نے ان سے کہا ہماری بہ نسبت رسول اللہ صلی اللہ تعالیٰ علیہ وآلہ وسلم نے آپ کو خاص طور پر راز کی بات بتائی پھر آپ رو رہی ہیں! جب رسول اللہ صلی اللہ تعالیٰ علیہ وآلہ وسلم تشریف لے گئے تو میں نے پوچھا آپ نے کیا راز کی بات کہی؟ فرمایا: میں رسول اللہ صلی اللہ تعالیٰ علیہ وآلہ وسلم کا راز کیسے فاش کروں! جب آپ صلی اللہ تعالیٰ علیہ وآلہ وسلم نے وصال فرمایا تو میں نے سیدہ فاطمہ علیہا السلام سے کہا کہ میرا جو حق تم پر ہے اس کی قسم دے کر پوچھتی ہوں بتاؤ۔ فرمایا: اب ہاں! پہلی مرتبہ آپ صلی اللہ تعالیٰ علیہ وآلہ وسلم نے فرمایا کہ جبرئیل ہر سال ایک مرتبہ مجھ سے قرآن کا دور کیا کرتے تھے اور اس سال دو مرتبہ دور کیا ہے، میرا خیال ہے کہ میری رحلت کا وقت قریب آ گیا ہے، پس اللہ سے ڈرو اور صبر کرو، میں تمہارے لیے بہترین پیش رو ہوں۔ فرمایا: اس پر میں رو پڑی جیسا تم نے دیکھا۔ جب آپ صلی اللہ تعالیٰ علیہ وآلہ وسلم نے میرا رنج دیکھا تو دوسری مرتبہ فرمایا: اے فاطمہ! کیا تم اس سے راضی نہیں ہو کہ تم مؤمن عورتوں کی سردار ہو یا اس امت کی عورتوں کی سردار ہو!