Urdu Translation

ہم سے مسدد نے بیان کیا، کہا ہم سے یوسف بن الماجشون نے بیان کیا، صالح بن ابراہیم بن حضرت عبدالرحمٰن بن عوف سے، انہوں نے اپنے والد سے، انہوں نے اپنے دادا (حضرت عبدالرحمٰن بن عوف رضی اللہ تعالیٰ عنہ) سے، انہوں نے فرمایا: غزوۂ بدر کے دن میں صف میں کھڑا ہوا تو میں نے اپنے دائیں بائیں دیکھا تو دو کم عمر انصاری نوجوان میرے ساتھ تھے۔ میں نے تمنا کی کہ کاش! میں ان سے زیادہ طاقتور لوگوں کے درمیان ہوتا۔ ان میں سے ایک نے مجھے ہلکے سے ٹہوکا دیا اور کہا: چچا! کیا آپ ابو جہل کو پہچانتے ہیں؟ میں نے کہا: ہاں، تمہیں اس سے کیا کام ہے بھتیجے؟ اس نے کہا: مجھے بتایا گیا ہے کہ وہ رسول اللہ صلی اللہ تعالیٰ علیہ وآلہ وسلم کو گالیاں دیتا ہے۔ اس ذات کی قسم جس کے قبضے میں میری جان ہے! اگر میں نے اسے دیکھ لیا تو میرا سایہ اس کے سایے سے الگ نہیں ہو گا جب تک ہم دونوں میں سے جس کی موت پہلے آنی ہو وہ مر نہ جائے۔ مجھے اس پر تعجب ہوا۔ پھر دوسرے نے بھی ٹہوکا دیا اور ایسی ہی بات کہی۔ ابھی تھوڑی دیر ہی ہوئی تھی کہ میں نے ابو جہل کو لوگوں میں چکر لگاتے دیکھا۔ میں نے کہا: دیکھو! یہی ہے تمہارا وہ آدمی جس کے بارے میں تم نے پوچھا تھا۔ وہ دونوں اپنی تلواریں لے کر اس پر ٹوٹ پڑے اور اسے مار مار کر قتل کر دیا۔ پھر رسول اللہ صلی اللہ تعالیٰ علیہ وآلہ وسلم کی بارگاہ میں حاضر ہوئے اور بتایا۔ آپ نے ارشاد فرمایا: تم دونوں میں سے کس نے اسے قتل کیا ہے؟ دونوں میں سے ہر ایک نے کہا: میں نے قتل کیا ہے۔ ارشاد فرمایا: کیا تم نے اپنی تلواریں صاف کی ہیں؟ دونوں نے عرض کیا: نہیں۔ آپ نے تلواریں دیکھیں اور ارشاد فرمایا: تم دونوں نے اسے قتل کیا ہے۔ اور اس کا مالِ غنیمت (اسلاب) حضرت معاذ بن عمرو بن الجموح کو دے دیا۔ اور وہ دونوں حضرت معاذ بن عفراء اور حضرت معاذ بن عمرو بن الجموح تھے۔ محمد نے کہا: یوسف نے صالح سے اور ابراہیم نے اپنے والد حضرت عبدالرحمٰن بن عوف سے سنا۔