Urdu Translation

ہم سے عیاش بن ولید نے بیان کیا، کہا ہم سے عبدالاعلیٰ نے بیان کیا، کہا ہم سے سعید بن ابی عروبہ نے بیان کیا۔ (دوسری سند) امام بخاری رحمۃ اللہ تعالیٰ علیہ نے فرمایا کہ مجھ سے خلیفہ بن خیاط نے بیان کیا، ان سے یزید بن زریع نے، ان سے سعید بن ابی عروبہ نے، ان سے قتادہ نے اور ان سے حضرت انس رضی اللہ تعالیٰ عنہ نے روایت کیا کہ نبی کریم صلی اللہ تعالیٰ علیہ وآلہ وسلم نے ارشاد فرمایا: جب بندے کو قبر میں رکھا جاتا ہے اور دفن کر کے اس کے ساتھی پیٹھ پھیر کر واپس جاتے ہیں تو وہ ان کے جوتوں کی آہٹ سنتا ہے۔ پھر دو فرشتے آتے ہیں، اسے بٹھاتے ہیں اور پوچھتے ہیں کہ اس شخص محمد (صلی اللہ تعالیٰ علیہ وآلہ وسلم) کے بارے میں تمہارا کیا عقیدہ ہے؟ وہ جواب دیتا ہے کہ میں گواہی دیتا ہوں کہ وہ اللہ کے بندے اور اس کے رسول ہیں۔ اس پر اس سے فرمایا جاتا ہے کہ جہنم میں اپنا ٹھکانا دیکھ، اللہ تعالیٰ نے اس کے بدلے تیرے لیے جنت میں جگہ عطا فرمائی ہے۔ نبی کریم صلی اللہ تعالیٰ علیہ وآلہ وسلم نے ارشاد فرمایا کہ پھر اس مومن بندے کو دونوں (جنت اور جہنم کے) مقامات دکھائے جاتے ہیں۔ اور رہا کافر یا منافق تو اس سے جب پوچھا جاتا ہے تو وہ کہتا ہے: مجھے معلوم نہیں، میں نے لوگوں کو ایک بات کہتے سنا تھا وہی کہتا رہا۔ پھر اس سے کہا جاتا ہے: نہ تو نے کچھ سمجھا اور نہ (نیک لوگوں کی) پیروی کی۔ اس کے بعد اسے لوہے کے ہتھوڑے سے کانوں کے درمیان مارا جاتا ہے اور وہ ایسی چیخ مارتا ہے کہ جن و انس کے سوا اردگرد کی تمام مخلوق سنتی ہے۔