Urdu Translation

ہم سے مسدد نے بیان کیا، کہا ہم سے یحییٰ بن سعید نے بیان کیا، ان سے عبیداللہ نے بیان کیا، فرمایا مجھ سے نافع نے بیان کیا اور ان سے حضرت عبداللہ بن عمر رضی اللہ تعالیٰ عنہما نے فرمایا کہ جب عبداللہ بن ابی (سردارِ منافقین) کا انتقال ہوا تو اس کا بیٹا (حضرت عبداللہ رضی اللہ تعالیٰ عنہ جو صحابی تھے) نبی کریم صلی اللہ تعالیٰ علیہ وآلہ وسلم کی خدمتِ اقدس میں حاضر ہوا اور عرض کیا: یا رسول اللہ! آپ اپنی قمیص عنایت فرمائیں تاکہ میں اپنے والد کو اس میں کفن دوں اور آپ ان کی نمازِ جنازہ پڑھائیں اور ان کے لیے مغفرت کی دعا فرمائیں۔ نبی کریم صلی اللہ تعالیٰ علیہ وآلہ وسلم نے اپنی قمیص عنایت فرما دی اور ارشاد فرمایا: مجھے اطلاع دو تاکہ میں ان کی نمازِ جنازہ پڑھاؤں۔ چنانچہ انہوں نے اطلاع دی۔ جب آپ صلی اللہ تعالیٰ علیہ وآلہ وسلم نماز پڑھانے کا ارادہ فرمایا تو حضرت عمر رضی اللہ تعالیٰ عنہ نے آپ صلی اللہ تعالیٰ علیہ وآلہ وسلم کو پکڑ لیا اور عرض کیا: کیا اللہ تعالیٰ نے آپ کو منافقین کی نماز پڑھنے سے منع نہیں فرمایا؟ آپ صلی اللہ تعالیٰ علیہ وآلہ وسلم نے ارشاد فرمایا: مجھے دو باتوں کا اختیار دیا گیا ہے (اللہ تعالیٰ نے) ارشاد فرمایا: «اسْتَغْفِرْ لَهُمْ أَوْ لاَ تَسْتَغْفِرْ لَهُمْ إِنْ تَسْتَغْفِرْ لَهُمْ سَبْعِينَ مَرَّةً فَلَنْ يَغْفِرَ اللَّهُ لَهُمْ» (ان کے لیے استغفار کرو یا نہ کرو، اگر تم ستر بار بھی ان کے لیے استغفار کرو تو بھی اللہ انہیں ہرگز نہیں بخشے گا)۔ چنانچہ آپ صلی اللہ تعالیٰ علیہ وآلہ وسلم نے اس پر نماز پڑھائی۔ پھر یہ آیت نازل ہوئی: «وَلاَ تُصَلِّ عَلَى أَحَدٍ مِنْهُمْ مَاتَ أَبَدًا» (اور ان میں سے جو بھی مرے اس کی نمازِ جنازہ ہرگز نہ پڑھنا)۔