Urdu Translation

ابن عون کہتے ہیں آیت کریمہ «ولمن انتصر بعد ظلمه فأولئك ما عليهم من سبيل» اور جو لوگ اپنے مظلوم ہونے کے بعد ( برابر کا ) بدلہ لے لیں تو ایسے لوگوں پر الزام کا کوئی راستہ نہیں ( سورۃ الشوریٰ: ۴۱ ) میں بدلہ لینے کا جو ذکر ہے اس کے متعلق میں پوچھ رہا تھا تو مجھ سے علی بن زید بن جدعان نے بیان کیا، وہ اپنی سوتیلی ماں ام محمد سے روایت کر رہے تھے، ( ابن عون کہتے ہیں: لوگ کہتے ہیں کہ وہ ( ام محمد ) اُمّ المؤمنین ۱؎ کے پاس جایا کرتی تھیں ) ام محمد کہتی ہیں: اُمّ المؤمنین نے کہا: میرے پاس رسول اللہ صلی اللہ تعالیٰ علیہ وآلہ وسلم تشریف لائے، ہمارے پاس زینب بنت حجش رضی اللہ تعالیٰ عنہا تھیں آپ اپنے ہاتھ سے مجھے کچھ چھیڑنے لگے ( جیسے میاں بیوی میں ہوتا ہے ) تو میں نے ہاتھ کے اشارہ سے آپ کو بتا دیا کہ زینب بنت حجش بیٹھی ہوئی ہیں، تو آپ رک گئے اتنے میں زینب آ کر حضرت اُمّ المؤمنین عائشہ رضی اللہ تعالیٰ عنہا سے الجھ گئیں اور انہیں برا بھلا کہنے لگیں، تو آپ نے انہیں اس سے منع فرمایا لیکن وہ نہ مانیں، تو آپ نے حضرت اُمّ المؤمنین عائشہ سے فرمایا: تم بھی انہیں کہو ، تو انہوں نے بھی کہا اور وہ ان پر غالب آ گئیں، تو اُمّ المؤمنین زینب رضی اللہ تعالیٰ عنہا، علی المرتضیٰ کرّم اللہ تعالیٰ وجہہ الکریم کے پاس گئیں، اور ان سے کہا کہ حضرت اُمّ المؤمنین عائشہ رضی اللہ تعالیٰ عنہا نے تمہیں یعنی بنو ہاشم کو گالیاں دیں ہیں ( کیونکہ ام زینب ہاشمیہ تھیں ) پھر فاطمہ رضی اللہ تعالیٰ عنہا ( نبی اکرم صلی اللہ تعالیٰ علیہ وآلہ وسلم کے پاس حضرت اُمّ المؤمنین عائشہ رضی اللہ تعالیٰ عنہا کی شکایت کرنے ) آئیں تو آپ صلی اللہ تعالیٰ علیہ وآلہ وسلم نے ان سے فرمایا: قسم ہے کعبہ کے رب کی وہ ( یعنی حضرت اُمّ المؤمنین عائشہ ) تمہارے والد کی چہیتی ہیں تو وہ لوٹ گئیں اور بنو ہاشم کے لوگوں سے جا کر انہوں نے عرض کیا: میں نے آپ سے ایسا اور ایسا کہا تو آپ نے مجھے ایسا اور ایسا فرمایا، اور علی المرتضیٰ کرّم اللہ تعالیٰ وجہہ الکریم بھی نبی اکرم صلی اللہ تعالیٰ علیہ وآلہ وسلم کے پاس آپ سے اس سلسلے میں گفتگو کی۔