الترجمة الأردية

حضرت حارثہ بن مضرب فرماتے ہیں کہ میں حضرت خباب رضی اللہ تعالیٰ عنہ کے پاس گیا اور ان کے پیٹ پر داغ لگایا گیا تھا۔ انہوں نے فرمایا: میں نہیں جانتا کہ نبی اکرم صلی اللہ تعالیٰ علیہ وآلہ وسلم کے صحابہ میں سے کسی نے اتنی مصیبت اٹھائی ہو جتنی میں نے اٹھائی ہے۔ ایک زمانہ تھا کہ نبی اکرم صلی اللہ تعالیٰ علیہ وآلہ وسلم کے عہد میں مجھے ایک درہم بھی نہیں ملتا تھا اور (اب) میرے گھر کے ایک کونے میں چالیس ہزار (درہم) رکھے ہیں۔ اگر رسول اللہ صلی اللہ تعالیٰ علیہ وآلہ وسلم نے ہمیں موت کی تمنا کرنے سے منع نہ فرمایا ہوتا تو میں ضرور موت کی تمنا کرتا۔ امام ترمذی فرماتے ہیں: ۱- خباب رضی اللہ تعالیٰ عنہ کی حدیث حسن صحیح ہے۔ ۲- اس باب میں انس، حضرت ابوہریرہ اور حضرت جابر رضی اللہ تعالیٰ عنہم سے بھی احادیث آئی ہیں۔ ۳- حضرت انس بن مالک رضی اللہ تعالیٰ عنہ سے روایت ہے کہ نبی اکرم صلی اللہ تعالیٰ علیہ وآلہ وسلم نے ارشاد فرمایا: تم میں سے کوئی کسی تکلیف کی وجہ سے موت کی تمنا نہ کرے، بلکہ یہ کہے: اے اللہ! مجھے زندہ رکھ جب تک زندگی میرے لیے بہتر ہو، اور مجھے وفات دے جب وفات میرے لیے بہتر ہو۔