الترجمة الأردية

حضرت اُمّ المؤمنین عائشہ رضی اللہ تعالیٰ عنہا فرماتی ہیں کہ نبی اکرم نے فرمایا: ”حضرت ابوبکر سے کہو کہ وہ لوگوں کو نماز پڑھائیں“، اس پر حضرت اُمّ المؤمنین عائشہ رضی اللہ تعالیٰ عنہا نے کہا: اللہ کے رسول! حضرت ابوبکر جب آپ کی جگہ ( نماز پڑھانے ) کھڑے ہوں گے تو رونے کی وجہ سے لوگوں کو قرأت نہیں سنا سکیں گے ۱؎، اس لیے آپ عمر کو حکم دیجئیے کہ وہ نماز پڑھائیں، پھر آپ نے فرمایا: ”حضرت ابوبکر کو حکم دو کہ وہ لوگوں کو نماز پڑھائیں“۔ حضرت اُمّ المؤمنین عائشہ رضی اللہ تعالیٰ عنہا فرماتی ہیں: تو میں نے حفصہ سے کہا: تم ان سے کہو کہ حضرت ابوبکر جب آپ کی جگہ کھڑے ہوں گے تو لوگوں کو رونے کے سبب قرأت نہیں سنا سکیں گے، اس لیے آپ عمر کو حکم دیں کہ وہ لوگوں کو نماز پڑھائیں، تو حفصہ نے ( ایسا ہی ) کیا، رسول اللہ صلی اللہ تعالیٰ علیہ وآلہ وسلم نے ارشاد فرمایا: ”تم وہی تو ہو جنہوں نے یوسف علیہ السلام کو تنگ کیا، حضرت ابوبکر سے کہو کہ وہ لوگوں کو نماز پڑھائیں، تو حفصہ نے حضرت اُمّ المؤمنین عائشہ سے ( بطور شکایت ) کہا کہ مجھے تم سے کبھی کوئی بھلائی نہیں پہنچی۔ امام ترمذی فرماتے ہیں: ۱- یہ حدیث حسن صحیح ہے، ۲- اس باب میں حضرت عبداللہ بن مسعود، حضرت ابوموسیٰ اشعری، حضرت ابن عباس، سالم بن عبید اور عبداللہ بن زمعہ رضی اللہ تعالیٰ عنہم سے بھی احادیث آئی ہیں۔