الترجمة الأردية

حضرت ابوہریرہ رضی اللہ تعالیٰ عنہ فرماتے ہیں کہ میں نے حضرت ابو سعید خدری رضی اللہ تعالیٰ عنہ کو کہتے سنا کہ درہم کو درہم سے، اور دینار کو دینار سے برابر برابر بیچنا چاہیئے، تو میں نے ان سے کہا کہ میں نے حضرت ابن عباس رضی اللہ تعالیٰ عنہما کو کچھ اور کہتے سنا ہے، حضرت ابوسعید رضی اللہ تعالیٰ عنہ فرماتے ہیں: تو میں حضرت ابن عباس رضی اللہ تعالیٰ عنہما سے جا کر ملا، اور میں نے ان سے کہا: آپ بیع صرف کے متعلق جو کہتے ہیں مجھے بتائیے، کیا آپ نے کچھ رسول اللہ صلی اللہ تعالیٰ علیہ وآلہ وسلم سے سنا ہے؟ کتاب اللہ ( قرآن ) میں اس سلسلہ میں آپ کو کوئی چیز ملی ہے؟ اس پر وہ بولے: نہ تو میں نے اس کو کتاب اللہ ( قرآن ) میں پایا ہے، اور نہ میں نے رسول اللہ صلی اللہ تعالیٰ علیہ وآلہ وسلم ہی سے سنا ہے، البتہ مجھے اسامہ بن زید رضی اللہ تعالیٰ عنہما نے بتایا ہے کہ رسول اللہ صلی اللہ تعالیٰ علیہ وآلہ وسلم نے ارشاد فرمایا ہے: سود صرف ادھار میں ہے ۱؎۔