الترجمة الأردية

حضرت انس بن مالک رضی اللہ تعالیٰ عنہ فرماتے ہیں کہ ایک بار ہم مسجد میں نبی کریم صلی اللہ تعالیٰ علیہ وآلہ وسلم کے ساتھ بیٹھے ہوئے تھے کہ ایک شخص اونٹ پر سوار ہو کر آیا، اونٹ کو مسجد میں بٹھایا اور باندھ دیا۔ پھر پوچھنے لگا: تم لوگوں میں محمد (صلی اللہ تعالیٰ علیہ وآلہ وسلم) کون ہیں؟ نبی کریم صلی اللہ تعالیٰ علیہ وآلہ وسلم اس وقت لوگوں کے درمیان تکیہ لگائے تشریف فرما تھے۔ ہم نے عرض کیا: یہ سفید رنگ والے بزرگ ہیں جو تکیہ لگائے تشریف فرما ہیں۔ وہ شخص آپ سے مخاطب ہوا: اے عبدالمطلب کے فرزند! آپ صلی اللہ تعالیٰ علیہ وآلہ وسلم نے ارشاد فرمایا: میں تمہاری بات سن رہا ہوں۔ اس نے عرض کیا: میں آپ سے کچھ دینی باتیں دریافت کروں گا اور سختی سے پوچھوں گا تو آپ برا نہ مانیے گا۔ آپ صلی اللہ تعالیٰ علیہ وآلہ وسلم نے ارشاد فرمایا: جو تمہارا دل چاہے پوچھو۔ اس نے عرض کیا: میں آپ کو آپ کے رب اور آپ سے پہلے کے لوگوں کے رب کی قسم دے کر پوچھتا ہوں، کیا اللہ نے آپ کو تمام لوگوں کی طرف رسول بنا کر بھیجا ہے؟ آپ صلی اللہ تعالیٰ علیہ وآلہ وسلم نے ارشاد فرمایا: اے اللہ! ہاں۔ پھر اس نے عرض کیا: میں آپ کو اللہ کی قسم دیتا ہوں، کیا اللہ نے آپ کو حکم دیا ہے کہ ہم رات دن میں پانچ نمازیں پڑھیں؟ آپ صلی اللہ تعالیٰ علیہ وآلہ وسلم نے ارشاد فرمایا: اے اللہ! ہاں۔ اس نے عرض کیا: میں آپ کو اللہ کی قسم دے کر پوچھتا ہوں، کیا اللہ نے آپ کو حکم دیا ہے کہ ہم سال میں اس مہینے (رمضان) کے روزے رکھیں؟ آپ صلی اللہ تعالیٰ علیہ وآلہ وسلم نے ارشاد فرمایا: اے اللہ! ہاں۔ اس نے عرض کیا: میں آپ کو اللہ کی قسم دے کر پوچھتا ہوں، کیا اللہ نے آپ کو حکم دیا ہے کہ ہمارے مالداروں سے زکوٰۃ لے کر ہمارے غریبوں میں تقسیم کریں؟ آپ صلی اللہ تعالیٰ علیہ وآلہ وسلم نے ارشاد فرمایا: اے اللہ! ہاں۔ تب وہ شخص کہنے لگا: جو احکام آپ اللہ کی طرف سے لائے ہیں، میں ان پر ایمان لایا، اور میں اپنی قوم کے پیچھے رہ جانے والوں کا قاصد بن کر آیا ہوں۔ میرا نام ضمام بن ثعلبہ ہے، بنو سعد بن بکر کے خاندان سے ہوں۔